Héraðsþing Ungmennasambands Vestur-Húnvetninga var haldið í Félagsheimilinu Hvammstanga á þriðjudaginn og sá Hestamannafélagið Þytur um skipulagningu þess. Á þinginu var Sveinbjörg Rut Pétursdóttur kjörin nýr formaður USVH til tveggja ára en hún tekur við af Guðrúnu Helgu Magnúsdóttur sem setið hefur sem formaður síðastliðin fjögur ár. Þá var nýr meðstjórnandi kjörinn til tveggja ára, Guðrún Gróa Þorsteinsdóttir, en hún tekur við af Elísu Ýr Sverrisdóttur.

Kjör á varamönnum til eins ár var óbreytt frá síðasta þingi en þeir eru Pálmi Geir Ríkharðsson, Valdimar Gunnlaugsson og Reimar Marteinsson.

Ekki voru gerðar lagabreytingar á þinginu en lögð var fram breytingartillaga ásamt einni nýrri tillögu við nefndarstörf. Báðar voru samþykktar og má finna fundargerð þingsins á vef USVH.

Gestir þingsins voru Viðar Sigurjónsson frá ÍSÍ og Auður Inga Þorsteinsdóttir frá UMFÍ.

Þingið minntist Agnars Levý sem lést nýlega en hann starfaði í ritnefnd Húna um árabil.