Harpa Birgisdóttir á Kornsá í Vatnsdal í Húnavatnshreppi fékk 56. Morgunblaðsskeifuna á Skeifudegi Grana á Hvanneyri á Sumardaginn fyrsta. Harpa er nemandi á fyrsta ári í búvísindadeild á Hvanneyri. Sá nemandi í hrossarækt 3 sem stendur sig best í verklegum prófum fær Morgunblaðsskeifuna, verðlaunagrip sem Morgunblaðið hefur veitt samfellt í 56 ár.

Harpa er dóttir þeirra Þórunnar Ragnarsdóttur og Birgis Gestssonar en þau reka sauðfjárbú á Kornsá. � viðtali við Morgunblaðið á föstudaginn segir Harpa m.a. „Ég er yngsta barnið og enginn hafði áhuga á hestum heima fyrr en ég byrjaði. Þá sýndu foreldrar mínir áhuga, fóru að keyra mig á reiðnámskeið og leggja upp úr því að hafa betri hross“. Hún vill nú samt meina að áhugi á hestamennsku hafi nú blundað í foreldrum hennar. Harpa segist stefna að því að verða sauðfjárbóndi og er að búa sig undir það.