Umhverfisstofnun telur að fyrirhuguð þjónustumiðstöð á Hveravöllum eigi að fara í umhverfismat hjá Skipulagsstofnun. Stofnunin bendir á í umsögn sinni að í stað hefðbundins skála standi nú til að reisa hótel fyrir 120 gesti og stórt bílastæði. Stofnunin minnir á að samkvæmt lögum verði hálendismiðstöð á Hveravöllum að falla að öllu leyti að kröfum um svokallaða óbyggðaupplifun. Sagt er frá þessu á vef Ríkisútvarpsins í dag.

Fyrr í þessum mánuði var greint frá því í fréttum að fyrirtækið Allrahanda áformi gríðarlega uppbyggingu á næstu árum í samvinnu við Húnavatnshrepp til að sinna ferðaþjónustu á hálendinu og er áætlað að uppbyggingin á Hveravöllum muni í heildina kosta um 600 milljónir króna. Uppbyggingin mun fara fram utan friðlands og núverandi mannvirki sem eru innan friðlandsins, eins og núverandi bílastæði, verða aflögð og grædd upp. Reisa á 640 fermetra þjónustumiðstöð með veitingasal, gistirými og gestastofu og byggt verður upp nýtt bílastæði utan friðlandsins.

Hótel mun breyta ásýnd svæðisins
Umhverfisstofnun segir í umsögn að hún telji að framkvæmdirnar eigi að fara í umhverfismat. Slíkt væri kjörinn vettvangur til að meta hvers konar starfsemi og mannvirki falli að kröfum um óbyggðaupplifun á hálendinu. Stofnunin telur að hótel muni breyta verulega ásýnd svæðisins og það geti mögulega leitt til aukins álags á viðkvæmt svæði og upplifun þeirra sem þarna fara um. Þá hefur stofnunin áhyggjur af því að aukin vatnstaka geti haft neikvæð áhrif á vatnsbúskap hverasvæðisins.

Umhverfisstofnun telur að meta þurfi hvort þessi fyrirhugaða uppbygging sé í samræmi við markmið stjórnvalda um uppbyggingu á hálendi Ã�slands - umfjöllun um möguleg áhrif á hverasvæðið sé ábótavant auk þess sem meta þurfi álag af völdum ferðamanna á hið viðkvæma svæði sem Hveravellir séu. 

� frétt Ríkisútvarpsins kemur fram að ekki væri líklegt að fyrirhugað hús yrði tilbúið fyrr en eftir 2-3 ár. Þegar niðurstaða lægi fyrir um umhverfismat þyrfti Húnavatnshreppur að samþykkja deiliskipulag og að því loknu gætu framkvæmdir hafist og þar sem Hveravellir eru á hálendinu er tími til framkvæmda afar takmarkaður.