Vonir standa til að á þessu ári hefjist framkvæmdir við uppsetningu á nýstárlegri gróðurstöð í Miðfirði í Húnaþingi vestra til framleiðslu á skógarplöntum. Einkahlutafélagið Skógarplöntur og verkefnastjóri frá Samtökum sveitarfélaga á Norðurlandi vestra, Magnús Barðdal, vinna að verkefninu. Í tengslum við það fór hópurinn í ferð til Svíþjóðar og Hollands á dögunum til að kynna sér aðrar sambærilegar gróðurstöðvar og skoða búnað frá framleiðendum. Sagt er frá þessu á facebooksíðu SSNV.

Þar segir að leitast verði við að hafa gróðurstöðina með fullkomnustu tækjum sem völ er á sem tryggi hámarksnýtingu á gróðurhúsum og jöfn gæði í allri framleiðslunni. Björn Líndal Traustason er framkvæmdastjóri Skógarplantna ehf. og er fulltrúi Kaupfélags vestur Húnvetninga sem er einn af stærstu hluthöfum í félaginu ásamt Hafbergi Þórissyni eiganda Lambhaga gróðurstöðvar. Jafnframt er Skúli Húnn Hilmarsson og Magnús Barðdal í verkefnahóp um uppbyggingu á gróðurstöðinni.

Tengd frétt:
Áform um risa gróðrarstöð í Húnaþingi vestra