Aðalfundur Ámundakinnar ehf. var haldinn síðastliðinn föstudag. Á dagskrá fundarins voru venjuleg aðalfundarstörf, þar á meðal samþykkt ársreiknings en árið 2019 var 16. starfsár félagsins. Samkvæmt ársreikningi nam hagnaður félagsins 11,7 milljónum króna samanborið við 636 þúsund krónur árið 2019. Betri afkoma skýrist helst af fleiri leigjendum, sameiningu og batnandi afkomu hlutdeildarfélaga. Leigutekjur námu rúmum 112 milljónum og jukust um 44% milli ára.

Rekstrargjöld jukust um 47% milli ára, námu 66,6 milljónum króna í fyrra en voru 45,2 milljónir árið 2018. Hagnaður fyrir fjármunatekjur og fjármagnsgjöld nam tæplega 48 milljónum króna samanborið við tæplega 33 milljónir árið 2018. Eigið fé félagsins var í árslok 2019 samtals 420,5 milljónir og jókst um 4% milli ára. Heildareignir námu um 1.110 milljónum króna og jukust um 13,6% milli ára.

Eigendahópur Ámundakinnar breyttist lítið á síðasta ári og er Byggðastofnun stærsti hluthafinn með um 20% hlut. Þar á eftir koma Blönduósbær, Hömlur, SAH og Húnavatnshreppur. Hluthafar eru 75 að tölu og nafnverð hlutafjár er tæplega 220 milljónir króna. Stjórn félagsins var endurkjörin á aðalfundinum en hana skipa þau Jón Gíslason formaður, Pétur Grétarsson varaformaður og Rannveig Lena Gísladóttir ritari.

Á fundinum fór Jóhannes Torfason, framkvæmdastjóri Ámundakinnar, yfir það helsta í starfsemi félagsins á síðasta ári. Í ársbyrjun var Fasteignafélagið Borg ehf. sameinað Ámundakinn. Húseignir félagsins eru á Hvammstanga og Sauðárkróki og báðar í útleigu. Sameiningin stækkaði efnahag Ámundakinnar um 10% og eykur hagkvæmni í rekstri. Ráðist var í byggingu á um 160 fermetra vörugeymslu og móttökuhúsi við Húnabraut 33, þar sem komið var fyrir brettalyftu milli hæða. Auðveldar aðstaðan alla meðhöndlum á brettum og léttir störf en Vilko er með starfsemi sína í húsinu.

Unnið var að endurbótum á Húnabraut 4 á síðasta ári og á næstu vikum hefja fjórir aðilar þar störf og rekstur. Tveimur rýmum hefur ekki verið ráðstafað sem eru 100 og 200 fermetrar en viðræður eru í gangi um minna rýmið. Í undirbúningi er að leggja varanlegt slitlag á um 500 fermetra af lóðinni meðfram húsinu að norðan. Einnig verða allar girðingar fjarlægðar og lóðin hreinsuð. Þá eru að hefjast viðræður við Samkaup um verulegar umbreytingar á verslunarrýminu á Húnabraut 4 og jafnvel stækkun. Þá keypti Ámundakinn snemma á síðasta ári húsnæði Húnabókhalds  á Húnabraut 13, alls um 170 fermetra. Í kjölfarið var gerður leigusamningur við KPMG endurskoðun um leigu á því til langs tíma.

Í máli Jóhannesar kom fram að húseignir félagsins eru samtals um 12 þúsund fermetrar að flatarmáli og fastir leigjendur 18 en á næstunni mun þeim fjölga um fjóra til sex. „Þegar horft er til baka og reynt að leggja mat á starf og árangur félagsins er ljóst að snertifletir þess við samfélagið eru margir. Ný hús og vinnustaðir  eru hinn augljósi vottur, en einnig bein aðkoma að fyrirtækjum. Umsvifin hafa líka treyst stoðir annarra fyrirtækja," sagði Jóhannes en framtíðarstefna Ámundakinnar er að vera bakhjarl og hvati til að efla atvinnu- og mannlíf í héraðinu.