Samkvæmt fjárhagsáætlun Húnaþings vestra fyrir árið 2021 verður sveitarsjóður rekinn með 58 milljón króna tapi. Áætlað er að fráveita og vatnsveita skili rekstrarafgangi, en að önnur B-hluta fyrirtæki verði rekin með halla. Tekjur sveitarfélagsins dragast saman milli ára m.a. vegna lægri framlaga frá Jöfnunarsjóði sveitarfélaga og lækkunar á útsvarstekjum vegna Covid-19.

Sveitarstjórn samþykkti fjárhagsáætlun ársins 2021 og þriggja ára áætlun fyrir árin 2022-2024 á fundi sínum síðastliðinn fimmtudag. Í greinargerð með áætluninni kemur fram að áhrif heimsfaraldursins setji tímabundið mark sitt á sveitarsjóð og að einhugur hafi verið á milli meirihluta og minnihluta um að verja grunnþjónustu sveitarfélagsins. „Fjárhagsáætlun fyrir árið 2021 er unnin við óvenjulegar aðstæður. COVID-19 heimsfaraldurinn teygir anga sína inn í rekstur sveitarfélagsins, líkt og á árinu 2020 þar sem áætlaður kostnaður vegna faraldursins er þegar komin í 88,3 milljónir króna,“ segir í greinargerðinni.

Í fjárhagsáætlun ársins 2021 eru heildartekjur Húnaþings vestra áætlaðar 1.556 milljónir króna, en gjöld 1.568 milljónir króna án fjármagnsliða. Fjármagnsliðir eru áætlaðir 46 milljónir króna og veltufé frá rekstri 43 milljónir. Áætlað er að afborganir langtímalána nemi um 70 milljónum króna og að handbært fé í árslok 2021 verði um 90 milljónir, sem er lækkun um 80 milljónir frá ársbyrjun. Eigið fé mun lækka á árinu um 58 milljónir króna miðað við afkomuspá ársins 2020. Gert er ráð fyrir hækkun langtímaskulda og skuldbindinga um 205 milljónir króna frá afkomuspá ársins 2020. Skuldahlutfall sveitarfélagsins er áætlað 89,2% árið 2021, en undanfarin ár hefur skuldaviðmiðið samkvæmt fjármálareglum mátt vera 150% að hámarki. 

Í bókun sveitarstjórnar segir:

Undanfarin ár hefur rekstur sveitarfélagsins verið í góðu jafnvægi. Hefur það leitt til þess að sveitarsjóður hefur ekki þurft að sækja í lántökur fyrir rekstri, en að sama skapi hefur verið gengið á eigið fé vegna afleiðinga heimsfaraldursins á fjármál Húnaþings vestra. Ljóst er að sveitarsjóður hefur ekki bolmagn til að skila sambærilegri rekstrarniðurstöðu að ári án lántöku. Aldrei hefur verið jafn mikilvægt að sýna ráðdeild í rekstri, halda áfram þeim framkvæmdum sem þegar eru hafnar, en sýna um leið skynsemi og lágmarka lántökur eins og kostur er.