Blönduósflugvöllur kom fyrir í umræðu á Alþingi í dag. Bjarni Jónsson, þingmaður Norðvesturkjördæmis minnti á mikilvægi vallarins fyrir sjúkraflug og benti á að ekki væri búið að ljúka því verki sem byrjað var á til að hann geti gegnt öryggishlutverki sínu fyrir svæðið. Vísaði hann til þess að ljúka þyrfti lagningu bundins slitlags á völlinn og að slík framkvæmd gæti kostað 40-70 milljónir króna. Skoraði hann á samgönguyfirvöld að sjá til þess að það yrði gert.

Í ræðu sinni sagði Bjarni að tryggt aðgengi að góðri heilbrigðisþjónustu skipti miklu máli fyrir búsetuöryggi. Víða um land hefði margvíslegri þjónustu verið hagrætt í burtu, eins og veigamikilli bráðaþjónustu. "Því miður er það svo að aðstöðu og búnaði á flugvöllum til sjúkraflugs hefur verið illa við haldið á mikilvægum stöðum. Það er full ástæða til að ræða hér enn og aftur aðstöðu til sjúkraflugs á Blönduósflugvelli," sagði Bjarni.

Nefni hann að þingmenn ættu að þekkja dæmi þess að landleiðin inn og út úr héraðinu hafi lokast, jafnvel dögum saman. Þá nefndi hann að um héraði færu um 700 þúsund bílar á ári og að þar hafi orðið alvarleg hópslys.

"Jákvæðar fréttir berast nú frá Blönduósi um margvíslega uppbyggingu, ekki síst í atvinnulífi eins og hátæknimatvælavinnslu í tengslum við það blómlega fyrirtæki Vilko. Fjölbreytt og góð búsetuskilyrði skipta miklu fyrir frekari eflingu byggðar og þar er búsetuöryggi og tryggt aðgengi að góðri heilbrigðisþjónustu grundvallaratriði. Þar gegnir sjúkraflug um Blönduósflugvöll lykilhlutverki fyrir íbúa í Húnavatnssýslum og þann fjölda fólks sem ferðast þar um," sagði Bjarni.

Í máli hans kom fram að það væri ekki langt síðan aðflugsljós hefðu verið lögð og komið upp GPS-kerfi til að auðvelda flug um völlinn og væri það vel. En til að klára verkið, svo Blönduósflugvöllur geti gegnt öryggishlutverki sínu fyrir svæðið, þyrfti að ljúka lagningu bundins slitlags.

"Slík framkvæmd gæti kostað nálægt 40 millj. kr. ef um yfirlögn er að ræða líkt og á Norðfjarðarflugvelli, sem gefist hefur vel, til að tryggja þar meira öryggi í sjúkraflugi. Það er nær 70 millj. kr. ef um malbikun er að ræða. Það eru ekki háar fjárhæðir miðað við hve mikið er í húfi. Ég vil því skora á samgönguyfirvöld að gegna því hlutverki sínu að sjá til þess að þessu mikilvæga verki verði lokið sem fyrst, enda standa til þess ríkir almannahagsmunir," sagði Bjarni í ræðu á Alþingi í dag.