Sveitarstjórn Húnaþings vestra hefur ákveðið að þær gjaldskrár sem hækkaðar voru um 5,5% um áramótin verði lækkaðar í sem nemur 3,5% hækkun frá árinu 2023. Sérstaklega verði horft til gjaldskrár sem varða barnafjölskyldur, einkum skólastofnana og íþróttamiðstöðvar. Þá ætlar sveitarfélagið að bjóða gjaldfrjálsar skólamáltíðir frá og með næsta hausti. Tilefnið er nýlega gerður kjarasamningur milli félaga ASÍ og Samtaka atvinnulífsins.

Á sveitarstjórnarfundi í gær, sem haldinn var í Riishúsi á Borðeyri var til umfjöllunar umræddur kjarasamningur. Samþykkt var samhljóða að verði hann samþykktur og sambærilegir samningar gerðir á opinberum markaði muni sveitarfélagið bjóða gjaldfrjálsar skólamáltíðir frá og með næsta hausti og út samningstímann. Einnig var samþykkt að gera breytingar á gjaldskrám eins og áður sagði og var sveitarstjóra falið að undirbúa þær breytingar og leggja fyrir á næsta sveitarstjórnarfundi. „Með þessu leggur sveitarstjórnin sitt af mörkum til að tryggja meiri stöðugleika sem vonandi leiðir til lægri verðbólgu og þar með lækkaðs vaxtastigs,“ segir í tilkynningu á vef Húnaþing vestra. 

Húnaþing vestra skorar á önnur sveitarfélög að hækka ekki gjaldskrár, sem snúa að barnafjölskyldum, umfram 3,5% á árinu.