Laxveiðiárnar Blanda og Svartá hafa verið auglýstar til leigu frá og með sumrinu 2025. Einkahlutafélagið Starir er með vatnasvæðið á leigu í dag en núgildandi leigusamningur rennur út í haust. Veiðifélag Blöndu og Svartár óskar eftir tilboðum í leigu eða umboðssölu á öllum veiðirétti félagsins í laxveiðiánum frá og með sumrinu 2025 og til og með sumrinu 2029 með almennu útboði.

Útboðsgögnin fást afhent hjá formanni stjórnar Veiðifélags Blöndu og Svartár, Guðmundi Rúnari Halldórssyni, Finnstungu, 541 Blönduós. Hægt er að hafa samband í netfangið formadur@blanda-svarta.is eða í síma 892-6675. Útboðsgögn verða afhent gegn 10.000 kr. skilagjaldi.

Tilboðum skal skilað í lokuðum umslögum eigi síðar en kl. 15:00 á skrifstofu Húnabyggðar á Blönduósi þann 15. júní næstkomandi þar sem þau verða opnuð í viðurvist þeirra bjóðenda sem þess óska. Veiðifélagið áskilur sér allan rétt til að taka hvaða tilboði sem er eða hafna þeim öllum.