Fjölmenni sótti minningarhátíð um Jónas Tryggvason í Blönduóskirkju þann 12. nóv. og þar voru frumflutt tvö lög við ljóð Jónasar. Annað lagið var eftir Benedikt Blöndal og flutt af karlakórnum en hitt var flutt af djasshljómsveit undir stjórn hins tónsmiðsins, Sigurdísar Söndru Tryggvadóttur. Fjölbreytileg tónlist var flutt á samkomunni sem bar starfi Tónlistarskólans gott vitni. Til samkomunnar komu 5 Fljótstungumenn, tengdamenn Jónasar heitins og notuðu þau strætó 57 til ferðarinnar sem hófst kl. 9 í Mjóddinni. Með sama vagni komust þau um kvöldið aftur heim til borgarinnar. Glúmur Gylfason komst ekki til samkomunnar en sendi stöku, sem ritarinn flutti:

Að kvæðum ræður Heiðmar hyggja
nú Húnvetningum býður þiggja
þau eftir Jónas liðinn liggja
ljóð sem vert er á að byggja. GlG

Þriðja lagið við ljóð Jónasar samdi Eiríkur söngstjóri Grímsson í Reykjavík. Húnakórinn flutti það í messukaffi í Þingborg 14. febrúar en um það leyti var 100. afmælisdagur Jónasar.

Benedikt samdi lag sitt við ljóðið Til þeirra sem héldu að ég væri skáld þar sem höfundurinn rabbar við heiminn meðan hann leikur á hörpu sína:

Ég kaus mér hörpu með háum streng,
en hafði hennar lítil not. 
Hún flutti aðeins einróma tóna
og undarleg stefjabrot.
 
Þá skipti ég um og lágstemmd lög
ég lék nú á streng minn, einn. 
Þeim hæfði víst ekki að heyrast víða, 
enda heyrði þau sjaldnast neinn.
 
Svo gafst ég upp, því engum er fært
að ætla sér þyngra en hann ber. 
Ég kastaði hörpunni af hendi í dýpsta
hylinn við fætur mér. JT

Jónas kaus sér hörpu og hann fann leið sem varðaði leið að betra samfélagi. Það var honum meira virði en innstæða á banka.  

Jón í Ártúnum var rúmlega ári yngri en Jónas og samstíga bróður sínum í tónlistar- og félagsmálum. Jón kvaddi kæran kórfélaga og vin þeirra beggja með ljóðmælum þegar prestaskipti urðu og Birgir Snæbjörnsson flutti frá Æsustöðum norður að Laufási:

Geymi þig góðar vættir
gefi þér konu, syni,
dætur og virktavini.
Vaxi þér stórar ættir.
Seinna þá ertu sestur
sjálfur að helgum steinum:
Geti af þínum greinum
gefist prestur hér vestur. JónT

Tengt efni á vefnum:
Minningarhátíð um Jónas Tryggvason: http://www.huni.is/index.php?pid=32&cid=13319 
Ljóð JT: http://stikill.123.is/blog/2011/11/11/550654/ 
Skilnaðarljóð Jóns í Ártúnum: http://bragi.info/hunafloi/ljod.php?ID=4838   
Vísur Glúms: http://bragi.info/hunafloi/hofundur.php?ID=18045   
Þeir urðu vinir á vondu ferðalagi: http://www.huni.is/index.php?cid=12589  
Rökkrið sveipaði rauðum tjöldum . . .  http://www.huni.is/index.php?cid=12568    
Efnisyfirlit á Stikilsvefnum: http://stikill.123.is/home/

Ingi Heiðmar Jónsson