Undralönd og ævintýra birti Jón Árnason samferðamönnum sínum og nýrri kynslóðum með sögum, þulum og öðrum skáldskap sem safnað var á nítjándu öldinni og þeir Magnús Grímsson urðu forgöngumenn fyrir. Konrad Maurer hinn þýski lagðist vel í ólarnar í þessum leiðangri og fyrsta útgáfa af þjóðsögum JÁ kom út í Leipzig 1862 og 1864 fyrir tilstyrk Maurers.

Alþingismennirnir Vilhjálmur Bjarnason og fleiri þingmenn minntu í tæka tíð á væntanleg tímamót – er 200 ár væru frá fæðingu Jóns á Hofi. Góðu heilli komst hann til mennta en þó ekki Hafnar.

Við heyrðum hvatningu þeirra Vilhjálms Bjarnasonar norður í land, tókum okkur til og höfðum guðsþjónustu og messukaffi á Hofi, fæðingarstað JÁ árið 2016, sem tókst með ágætum enda komu þar að margar framréttar hendur, sumar til að taka þátt í hálftímaforspili fyrir messuna, mun fleiri tóku þátt í safnaðarsöngnum í kirkjunni og safnaðarfólk úr heimasókn lét ekki sitt eftir liggja.

Þessi góða stund í Skagabúð og kirkju sýndi okkur að við gátum fylkt okkar liði á heimaslóð Jóns og fagnað þar hvað sem stofnanir gerðu syðra, en við náðum saman traustu samstarfi í sveit og borg og  hátíðin norður á Skaga á sjálfan afmælisdaginn varð sú fyrsta af þremur. Hinar tvær voru í Landsbókasafni og á vegum Árnastofnuna. Meðal gesta í Hofskirkju var landsbókavörðurinn Ingibjörg Steinunn, Örn Hrafnkelsson sagnfræðingur við sömu stofnun og forsetinn og sagnfræðingurinn Guðni Th. Jóhannesson kom til málþingsins og afhjúpaði minnismerki um Jón við Spákonufellshöfðann.

Dagurinn, 17. ágúst 2019, varð mikill og góður hátíðardagur og Skagamenn, Skagstrendingar og héraðsbúar margir lögðu leið sína á Ströndina til að gleðjast yfir þessum ötula syni sveitarinnar.  

En guðsþjónusta á Hofi - tengd degi JÁ - féll niður í fyrra og fellur niður í ár vegna kóvíd 19. Við höfðum undirbúið guðsþjónustu á Hofi nú í sumar þann 17. ág., með þeim Kristínu Leifs Árnadóttur, djákna á Borðeyri og sr. Ólafi á Mælifelli. Einnig ætlaði Ólafur Dýrmundsson búvísindamaður og Húnvetningur að rabba við okkur um bóndann í borginni, en Ólafur hefur haldið sauðfé í Reykjavík allt frá unglingsárum sínum. Fleiri úr hirð Jóns voru væntanlegir en vonandi fáum við betra leiði næsta sumar, sjáum skína sól á stuðlabergið út í víkinni og gluggana á Hofskirkju.

Eldra efni:
Römm er sú taug . . um Bessastaðaskóla: https://www.huni.is/index.php?pid=58&cid=15326 Sögukufl úr sólskini – um þjóðsögur JÁ: https://www.huni.is/index.php?pid=58&cid=13068
Ný þjóðsagnabók og Jónsdagar: https://www.huni.is/index.php?pid=58&cid=15105
Kalt er við kórbak: https://www.huni.is/index.php?pid=58&cid=15980
Sögukorn af JÁ - 2019: https://www.huni.is/index.php?pid=58&cid=16088
JÁ heiðraður í Reykjavík 2019: https://www.huni.is/?cid=16123
Messufall í fyrra – Fornastaðir og Jónas Illugason: https://www.huni.is/index.php?pid=58&cid=17286 Hátíð á Skaga fyrir tveim árum: https://www.huni.is/index.php?pid=58&cid=16098
Jónsdagar fyrir þrem árum: https://www.huni.is/index.php?pid=58&cid=15039
Tjarnarmessa fyrir fjórum árum: https://www.huni.is/index.php?pid=58&cid=14000
Hofsmessa fyrir fimm árum: https://www.huni.is/index.php?pid=58&cid=13102

Grein Vilhjálms Bjarnasonar frá febr. 2015, m.a. er þar getið um þingsályktun þeirra Katrínar Jakobsdóttir, Ragnheiðar Ríkharðsdóttur og Valgerðar Gunnarsdóttur að minnast Jóns Árnasonar, þegar 200 ár verða liðin frá fæðingu hans, 17. ágúst 2019: https://www.mbl.is/greinasafn/grein/1543208/

Ingi Heiðmar Jónsson