Jarðvinnsla fyrir skógrækt í hlíðum Spákonufells er hafin en hún felur í sér að fjarlægja gróðurtorfur til að minnka samkeppni nýgróðursettra skógarplantna um næringu vatns og birtu. Notast er við svokallaða TTS-herfingu en hún er algengasta gerð af jarðvinnslu fyrir skógrækt, að því er fram kemur á vef Skagastrandar. Gróðursetja á um 90 þúsund trjáplöntur í haust.

Þar kemur fram að TTS herfi er lyftutengt glussatæki sem hengt er aftan í dráttarvél og hefur að geyma tvö stór hjól með tönnum sem rífa upp gróðurtorfuna og ýta til hliðar. Við það myndast rás sem skapar skjól og betri vaxtarmöguleika fyrir plöntuna. Rásirnar hverfa á tveimur til fimm árum allt eftir því hvernig land er jarðunnið.

Jarðvinnsla hefur margskonar ávinning fyrir nýgróðursettar skógarplöntur s.s aukinn jarðvegshita, skjólgjafi, aukið framboð næringarefna og minni samkeppni frá öðrum plöntum. Jarðvinnsla bætir árangur gróðursetninga bæði lifun og vöxt ásamt því að auðvelda gróðursetningu og auðvelda val á gróðursetningarstöðum.

Áætlað er að jarðvinna í hlíðum Spákonufells í þessum mánuði, bæði fyrir haustgróðursetningu 2022 og vorgróðursetningu 2023, samtals um 60 hektara. Skógræktin í hlíðum Spákonufells er partur af skógræktarverkefni Skógræktarinnar og One Tree Planted en gróður setja á 180 þúsund trjáplöntur. Líklegt er að helmingurinn verði gróðursettur í haust. Verkefninu á að ljúka haustið 2024 og í kjölfarið vex upp skógur sem meðal annars nýtist íbúum Skagastrandar, nágrönnum þeirra og gestum til útivistar.