|
12:20 |
13. mars 2020 |
Mikil áhrif COVID-19 faraldursins
Áhrif COVID-19 faraldursins á íslenskt samfélag verða stöðugt meiri. Búið er að virkja heimildir sóttvarnalaga til að takmarka samkomur tímabundið í fjórar vikur frá og með næsta mánudegi, skólastarf verður takmarkað næstu fjórar vikurnar og kennsla í háskólum og framhaldskólum um allt land felld niður. Þá fellur allt messuhald og vorfermingar niður í Þjóðkirkjunni. |
|
11:42 |
13. mars 2020 |
Heimildarmynd um Isolation Game Jam
Gerð hefur verið 30 mínútna heimildarmynd um Isolation Game Jam leiksmiðjuna sem haldin hefur verið undanfarin ár á sveitabænum Kollafossi í Húnaþingi vestra. Game jam er nokkurs konar smiðja sem tíðkast reglulega hjá leikjahönnuðum og áhugafólki um leikjahönnun. Viðburðirnir eru opnir þar sem fólk hittist og skapar leiki á stuttum tíma eða með fyrirfram ákveðnum reglum og áskorunum. |
|
11:23 |
13. mars 2020 |
Samkomubann tekur gildi á mánudaginn
Samkomubann verður sett á hérlendis vegna COVID-19 faraldursins. Þetta kom fram á blaðamannafundi sem heilbrigðisráðherra efndi til í Ráðherrabústaðnum í morgun. Takmarka skal samkomur í fjórar vikur frá aðfaranótt mánudagsins. Um er að ræða samkomur þar sem fleiri en 100 manns koma saman. Á viðburðum þar sem færri koma saman er gert ráð fyrir því að tveir metrar séu á milli fólks. Gert er ráð fyrir því að skólar á framhalds- og háskólastigi loki. |
|
10:40 |
13. mars 2020 |
Frumvarp til að tryggja að sveitarstjórnir geti starfað við neyðarástand
Umhverfis- og samgöngunefnd Alþingis hefur lagt fram frumvarp um breytingu á sveitarstjórnarlögum sem ætlað er að skapa sveitarfélögum svigrúm til að bregðast við neyðarástandi og tryggja að sveitarstjórnir verði starfhæfar. Í frumvarpinu er lagt til að ráðherra geti veitt sveitarstjórnum tímabundna heimild að til víkja frá tilteknum ákvæðum sveitarstjórnarlaga til að sveitarstjórn sé starfhæf við neyðarástand og til að auðvelda ákvarðanatöku. |
|
10:37 |
13. mars 2020 |
Snjósöfnun undir háspennulínum
Mikið hefur snjóað á Þverárfjalli og hefur hann hlaðist undir háspennulínu RARIK á svæðinu frá Þverá til Hvammshlíðar. Snjórinn er nú orðinn svo mikill að vírinn þar sem hann er lægstur er kominn niður fyrir tvo metra. Næstkomandi mánudag á að reyna að ryðja snjó undan línunni ef aðstæður leyfa. Um fleiri kafla á línunni getur verið að ræða og fólk sem á leið um svæðið er vinsamlegast beðið um að sýna varkárni. |
|
11:44 |
12. mars 2020 |
Námsstyrkir til nemenda með lögheimili á Skagaströnd
Sveitarfélagið Skagaströnd auglýsir námsstyrki sem nemendur á framhalds- og háskólastigi eiga rétt á samkvæmt ákvörðun sveitarstjórnar. Þurfa þeir að eiga lögheimili á Skagaströnd og uppfylla skilyrði reglna um styrkina. Námstyrkur til hvers nemanda nemur 20 þúsund krónum skólaárið 2019-2020 og er hann veittur til jöfnunar á námskostnaði fjarri heimabyggð. Umsóknarfrestur er 10. apríl næstkomandi. |
|
10:48 |
12. mars 2020 |
Hvetjum til notkunar rafrænna samskipta
Frá Sýslumanninum á Norðurlandi vestra
Sýslumaðurinn á Norðurlandi vestra hvetur til notkunar rafrænna samskipta. Minnum á www.island.is og www.syslumenn.is eru alltaf aðgengilegar. Hvetjum viðskiptavini til að nota sér rafrænar þjónustuleiðir í samskiptum, svo sem að senda fyrirspurnir í tölvupósti á nordurlandvestra@syslumenn.is eða innheimta@syslumenn.is . Síminn hjá okkur er 458-2500 þar er svarað kl. 9.00 - 15.00. |
|
08:07 |
12. mars 2020 |
Súpukvöldi á Skagaströnd frestað
Frá Soroptimistaklúbbnum Við Húnaflóa
Súpukvöldi Soroptimistaklúbbsins Við Húnaflóa sem vera átti á Skagaströnd í kvöld hefur verið frestað.
Ný dagsetning verður auglýst þegar þær upplýsingar liggja fyrir. |
|
13:18 |
11. mars 2020 |
Rýna þarf ýmis atriði í tengslum við sameiningu sveitarfélaganna
Á fundum ráðgjafa RR ráðgjafar með sveitarstjórnum í Austur-Húnavatnssýslu hafa komið fram ákveðnir fyrirvarar í tengslum formlegar sameiningarviðræður sveitarfélaganna. Í fundargerð sameiningarnefndar A-Hún. frá 25. febrúar síðastliðnum kemur fram að sveitarstjórn Skagastrandar hafi lagt fram ósk um að unnið yrði að því að finna samhljóm og sameiginlega megin hagsmuni á svæðinu. Þá kom fram ósk frá sveitarstjórn Húnavatnshrepps um að mörkuð yrði stefna varðandi framtíðarverkefni á Húnavöllum ef skólahald þar leggist af. |
|
13:00 |
11. mars 2020 |
Fimm þúsund krónur fyrir skil á merktum hrognkelsum
Hafrannsóknastofnun og BioPol ehf. á Skagaströnd hafa um langt árabil átt í samstarfi um merkingar á hrognkelsum. Í fyrra og hittifyrra voru 760 ungfiskar merktir í alþjóðlegum markíl leiðangri norður og suður af Íslandi og við austurströnd Grænlands. Á vef Biopol segir að ekki sé vitað til þess að ungviði hafi áður verið merkt með þessum hætti og að endurheimtur geti gefið mjög mikilvægar upplýsingar um vöxt hrognkelsa og hvert þau gangi til hrygningar. |
|
09:25 |
11. mars 2020 |
Gul veðurviðvörun í dag
Gul veðurviðvörun er í gildi í dag á Norðurlandi vestra. Gert er ráð fyrir norðaustan 15-23 metrum á sekúndu og talsverðri snjókomu og skafrenningi, einkum í Skagafirði, á Tröllaskaga og á Ströndum. Búast má við takmörkuðu skyggni og lélegum akstursskilyrðum. Vegurinn um Þverárfjall er lokaður og sömu sögu er að segja um veginn yfir Öxnadalsheiði. |
|
16:11 |
10. mars 2020 |
Fundur um heilsueflingu á Skagaströnd - FUNDI FRESTAÐ
Sveitarfélagið Skagaströnd býður íbúum, 60 ára og eldri, til fundar í Félagsheimilinu Fellsborg, miðvikudaginn 11. mars næstkomandi klukkan 17:30, til að ræða um heilsueflingu. Aðstaða til hreyfingar og líkamsræktar á Skagaströnd er góð og að margir íbúar nýti sér hana nú þegar. „Okkur langar til þess að koma enn betur til móts við bæjarbúa og heyra álit og áhuga þessa aldurshóps á frekari heilsueflingu. Ásdís Adda Ólafsdóttir sjúkraþjálfari verður okkur innan handar og heldur erindi um ávinning hreyfingar og mikilvægi hennar,“ segir í tilkynningu frá sveitarstjórn. |
|
15:55 |
10. mars 2020 |
Lýðheilsa og áhrifavaldar í Húnaþingi vestra
Fyrirlestrinum hefur verið FRESTAÐ
Ungmennasamband Vestur-Húnvetninga býður til fyrirlestrar laugardaginn 14. mars klukkan 14 í Íþróttamiðstöðinni á Hvammstanga. Þar ætlar Baldur Þór Ragnarsson, þjálfari meistaraflokks Tindastóls í körfubolta og styrktarþjálfari, að ræða liðsmenningu og markmiðastjórnun í tengslum við störf sín. Fyrirlesturinn er öllum opinn án endurgjalds og styrktur af UMFÍ, Rannís, Ungmennaráði og Húnaþing vestra. |
|
12:05 |
10. mars 2020 |
Lokað fyrir heimsóknir á sjúkrahúsið á Hvammstanga
Framkvæmdastjórn Heilbrigðisstofnunar Vesturlands hefur í samráði við sóttvarnalækna heilbrigðisumdæmisins lokað fyrir heimsóknir ættingja og gesta allan sólarhringinn nema í sérstökum undantekningartilfellum. Þessi ákvörðun gildir þar til annað verður tilkynnt formlega. Lokunin gildir fyrir legudeildir sjúkrahússins á Akranesi, í Stykkishólmi auk hjúkrunardeilda HVE á Hólmavík og á Hvammstanga. |
|
11:28 |
10. mars 2020 |
Til skjólstæðinga Félags- og skólaþjónustunnar
Vegna neyðarstigs Almannavarna vegna COVID-19 kórónaveirunnar
Velferð og heilsa starfsfólks og skjólstæðinga er í forgangi. Miða áætlanir og viðbrögð að því að takmarka eins og kostur er að starfsfólk veikist og/eða smiti aðra starfsmenn og að samfélagið í heild verði í stakk búið til að takast á við afleiðingar veirunnar. Því óskum við eftir því að skjólstæðingar og starfsfólk reyni eftir fremsta megni vinna úr málum í gegnum síma eða tölvupóst, mikilvægt er að halda fundahöldum í lágmarki. Þá er hægt að skilja eftir erindi í póstkassa í anddyri. |
Til baka
Loka
Prenta
