|
11:41 |
22. mars 2020 |
Íbúar Húnaþings vestra geta sent inn fyrirspurnir
Fimm Covid-19 smit hafa verið staðfest á Norðurlandi vestri og eru þau öll í Húnaþingi vestra. Hálfgert útgöngubann var sett þar á í gærkvöldi þegar öllum íbúum var gert að sæta svokallaðri úrvinnslusóttkví. Það þýðir að aðeins einn af hverju heimili má sækja aðföng og að hámarksfjöldi þeirra sem má koma saman er fimm.
Sveitarfélagið hefur opnað fyrirspurnarform á heimasíðu sinni þar sem íbúar geta sent inn fyrirspurnir sem varða aðgerðir almannavarna í gærkvöldi. Reynt verður að svara öllum spurningum eins fljót og kostur er. |
|
18:49 |
21. mars 2020 |
COVID-19 Úrvinnslusóttkví í Húnaþingi vestra
Tilkynning frá Aðgerðarstjórn almannavarna á Norðurlandi vestra
Vegna grunsemda um víðtækt smit í Húnaþingi vestra verður að grípa til hertra sóttvarnaraðgerða strax. Frá og með kl. 22:00 í kvöld laugardaginn 21.mars 2020 skulu allir íbúar sveitarfélagsins sæta úrvinnslusóttkví. Úrvinnslusóttkví er tímabundin ráðstöfun meðan unnið er að smitrakningu. Í henni felst að einungis einn aðili af hverju heimili getur í hvert sinn yfirgefið heimilið til að afla aðfanga. |
|
13:58 |
21. mars 2020 |
Viðspyrna fyrir Ísland – efnahagsaðgerðir stjórnvalda
Katrín Jakobsdóttir, forsætisráðherra, Bjarni Benediktsson, fjármála- og efnahagsráðherra og Sigurður Ingi Jóhannsson, samgöngu- og sveitarstjórnarráðherra kynntu aðgerðir stjórnvalda til að bregðast við áhrifum heimsfaraldurs kórónuveiru í Hörpu í dag. Umfang aðgerða fyrsta áfanga nemur um 230 milljörðum króna eða tæplega 8% af landsframleiðslu. Aðgerðirnar eru þríþættar og miða að því að tryggja afkomu fólks og fyrirtækja, verja grunnstoðir samfélagsins og skapa öfluga viðspyrnu fyrir efnahagslífið. |
|
16:46 |
20. mars 2020 |
Áherslubreytingar hjá Blönduósbæ
Frá áramótum hefur verið unnið að áherslubreytingum á skrifstofu Blönduósbæjar og þjónustumiðstöð bæjarins. Breytingarnar ná til verkaskiptingar, starfsheita og ábyrgðar lykilstarfsmanna. Á vef Blönduósbæjar koma fram þær starfsmannabreytingar sem orðið hafa. Kristín Ingibjörg Lárusdóttir hefur tekið við starfi sem launafulltrúi sveitarfélagsins en hún sinnir jafnframt öðrum sérhæfðum og almennum skrifstofustörfum. Elfa Björk Sturludóttir sem áður var launfulltrúi, hefur tekið við starfi sem gjaldkeri, en hún sinnir jafnframt öðrum sérhæfðum og almennum skrifstofustörfum. |
|
16:30 |
20. mars 2020 |
Blönduósbæjar lokar almennri afgreiðslu skrifstofu tímabundið
Lokað verður fyrir almenna afgreiðslu á skrifstofu Blönduósbæjar á meðan á samkomubanni stendur. Áfram verður svarað erindum og leitast við að aðstoða og leiðbeina íbúum eftir fremsta megni, en aðgengi verður takmarkað til öryggis. Þetta kemur fram í tilkynningu á vef Blönduósbæjar. |
|
16:13 |
20. mars 2020 |
Hlé gert á íþrótta- og æskulýðsstarfi barna og ungmenna sem felur í sér blöndun hópa
Heilbrigðisráðuneytið hefur í samvinnu við og mennta- og menningarmálaráðuneytið mælst til þess að hlé verði gert á öllu íþrótta- og æskulýðsstarfi barna og ungmenna sem felur í sér blöndun hópa, nálægð við aðra og snertingu þar til samkomubanni og takmörkun á skólastarfi lýkur. Þetta kemur fram á vef Stjórnarráðsins. Þar er að finna leiðbeinandi viðmið um hvernig beri að túlka auglýsingar um takmörkun á samkomum vegna farsótta og takmörkun á skólastarfi vegna farsótta þegar kemur að íþrótta- og æskulýðsstarfi barna, ungmenna og fullorðinna. |
|
12:54 |
20. mars 2020 |
Hlýjar kveðjur frá forseta Íslands
Forseti Íslands hefur sent íbúum Húnaþings vestra hlýjar kveðjur og góðar óskir í kjölfar þess að Covid-19 smit kom upp í sveitarfélaginu. „Við stöndum núna í ströngu saman, þjóðin öll. Saman munum við vinna bug á veirunni skæðu. Blessunarlega hafa ekki fleiri greinst með veikina sem henni fylgir á ykkar heimaslóðum en annars staðar á landinu. Á hinn bóginn hafa óvenjumargir þurft að fara í sóttkví í varnaðarskyni og það hefur sín áhrif í litlu og nánu samfélagi,“ segir í bréfinu. |
|
12:32 |
20. mars 2020 |
Stuðningur við FabLab smiðjuna á Sauðárkróki
Samtök sveitarfélaga á Norðurlandi vestra og Hátæknisetrið á Sauðárkróki hafa gengið frá samningi um stuðning samtakanna við rekstur FabLab aðstöðu á Sauðárkróki. Verkefninu er ætlað að efla nýtingu grunnskóla á starfssvæði samtakanna á aðstöðunni í kennslu. FabLab stendur fyrir Fabrication Laboratory og er smiðja með tækjum og tólum til að búa til nánast hvað sem er. FabLab smiðjan gefur ungum sem öldnum, einstaklingum og fyrirtækjum, tækifæri til að þjálfa sköpunargáfuna og hrinda hugmyndum sínum í framkvæmd með því að hanna, móta og framleiða hluti með aðstoð stafrænnar tækni. |
|
11:59 |
20. mars 2020 |
409 smitaðir af Covid-19
Alls hafa 409 smit af Covid-19 veirunni verið staðfest á landinu samkvæmt nýjum tölum á vefnum covid.is. Hefur þeim fjölgað um 75 milli daga og um 151 síðustu tvo daga. Flest smit eru á höfuðborgarsvæðinu eða 349 og eru 2.934 í sóttkví. Tveir eru smitaðir á Norðurlandi vestra og 237 eru í sóttkví og tveir eru smitaðir á Norðurlandi eystra og 194 í sóttkví. Á Vestfjörðum hafa engin smit verið staðfest en þar er 21 í sóttkví. |
|
09:50 |
20. mars 2020 |
Hugmyndir að aðgerðum til viðspyrnu fyrir íslenskt atvinnulíf lagðar fram
Samband íslenskra sveitarfélaga hefur lagt fram hugmyndir og ábendingar að aðgerðum til viðspyrnu fyrir íslenskt atvinnulíf. Sambandið beinir því til sveitarfélaga að hrinda þeim framkvæmd eins og kostur í ljósi þess samdráttar sem blasir við í þjóðarbúskapnum. Ríkisstjórn og Alþingi er einnig hvatt til að gera viðeigandi ráðstafanir svo þær verði að veruleika. Stjórn sambandsins mun áfram fylgjast vel með áhrifum þessa samdráttar og móta frekari tillögur að viðbrögðum sveitarfélaga eftir því málum vindur fram, að því er segir í tilkynningu. |
|
08:20 |
20. mars 2020 |
Gul veðurviðvörun í dag
Veðurstofa Íslands hefur gefið út gula veðurviðvörun fyrir landið allt í dag. Gert er ráð fyrir sunnan hvassviðri eða stormi og slyddu og rigningu. Fyrir Norðurlandi vestra gildir viðvörunin frá klukkan 10 til 22. Spá er sunnan hvassviðri eða stormi með vindhraða 18-23 metrum á sekúndu og hlánar smá saman. Mjög hált getur orðið og er fólk hvatt til að fara varlega. Þá hefur einnig verið gefin út gul veðurviðvörun fyrir sunnudaginn 22. mars frá hádegi og til miðnættis. |
|
21:26 |
19. mars 2020 |
Mikil vonbrigði með synjun styrkumsóknar
Byggðaráð Blönduósbæjar lýsir yfir miklum vonbrigðum með að umsókn sveitarfélagsins um styrk úr Framkvæmdasjóði ferðamannastaða skuli hafa verið synjað, sérstaklega með tilliti til þess að mikil þörf er á uppbyggingu ferðamannastaða á svæðinu. Þá bendir byggðaráð á það hróplega ósamræmi sem er í úthlutun þessa árs, á milli landshluta, þar sem til Norðurlands vestra koma aðeins 34 milljónir af heildarfjárhæðinni sem er rúmlega 500 milljónir. |
|
18:11 |
19. mars 2020 |
N4 fjallar um afleiðingar Covid-19
Karl Eskil Pálsson, á norðlensku sjónvarpsstöðinni N4, var á ferðinni á Norðurlandi vestra í dag og ræddi m.a. við Ragnheiði Jónu Ingimarsdóttur, sveitarstjóra Húnaþings vestra og Stefán Vagn Stefánsson, yfirlögregluþjón á Norðurlandi vestra um það fordæmalausa ástand sem nú ríki á Hvammstanga og í heiminum öllum í tengslum við Covid-19 faraldurinn. |
|
16:21 |
19. mars 2020 |
Rafíþróttir í Húnaþingi
Búið er að stofna síðu á Facebook sem nefnist Rafíþróttir í Húnaþingi. Aðstandendur hennar eru Jóhannes Gunnar Þorsteinsson á Kollafossi og Aðalsteinn Grétar Guðmundsson. Í færslu á síðunni segir Jóhannes að þeir félagar að verið að prófa sig áfram með hugmyndir um rafíþróttafélag á svæðinu. Vegna atburða síðustu daga í Húnaþingi vestra hafi þeir ákveðið að spýta í lófana til að koma þessu félagsstarfi í gang. „Tölvuleikir geta nefnilega boðið upp á félagslega nánd og tengingu án líkamlegrar nánd, sem að er svo mikilvægt þessa dagana.“ |
|
15:45 |
19. mars 2020 |
Nemendur Höfðaskóla moka snjó
Nemendum í Höfðaskóla stendur til boða að mæta með skóflur í skólann til þess að moka frá útidyrahurðum, göngustígum og ruslatunnum hjá íbúum Skagastrandar. Mikið hefur snjóað á Skagaströnd og í ljósi óvenjulegra aðstæðna í samfélaginu, sem bitnar m.a. á skólahaldi, var ákvörðun tekin um þetta samfélagsverkefni. „Við vonum að þið takið vel í þetta verkefni hjá okkur, við kennum krökkunum samheldni og samfélagslega ábyrgð með þessu. Ljóst er að krakkarnir komast ekki yfir allan bæinn en munu reyna sitt besta til að hjálpa sem flestum,“ segir á vef Höfðaskóla. |
Til baka
Loka
Prenta
