Kæru íbúar

Það eru þrjár vikur liðnar frá því að samkomubann var sett á og nú hefur það verið framlengt af stjórnvöldum til 4. maí 2020 en á næstu dögum koma frekari upplýsingar um afléttingu. Það er ánægjulegt að upplifa og finna fyrir þeirri samstöðu sem ríkir í okkar samfélagi og þegar þetta er ritað hefur ekki komið upp staðfest smit í A-Hún en vettvangsstjórn  (VST) staðsett á Blönduósi á vegum almannavarna hefur nú verið virkjuð, og vinnur með aðgerðarstjórn (AST).

Nú er allt skólahald komið í páskafrí en samþykkt var fyrir helgina að leikskólinn myndi fylgja grunnskóla í páskafrí, þ.e. frá föstudeginum 3. apríl og fram yfir páskahelgina. Hjá leikskóla var þó boðið uppá gæslu fyrir börn á forgangslista sem er samkvæmt tilmælum almannavarna.     

Skrifstofa sveitarfélagsins er nú lokuð fyrir almennri afgreiðslu en leitast er við að leiðbeina og svara öllum erindum í gegnum síma eða með tölvupósti. Sjá nánar á www.blonduos.is .

Á meðan þetta ástand varir þurfum við öll að standa saman og sýna samfélagslega ábyrgð í því hvernig við heftum frekari útbreiðslu á COVID-19. Við þurfum að huga sérstaklega að þeim íbúum sem eru veikir fyrir og leggja okkur fram um að aðstoða þá sem þess þurfa.

Ég vil nota þetta tækifæri til þess að óska öllum íbúum gleðilegra páska, þó þeir séu nú haldnir við óvenjulegar aðstæður en við erum hvött til þess að halda okkur á heimaslóðum.

 Við munum fara í gegnum þetta saman, fylgja leiðbeiningum og fyrirmælum stjórnvalda, og höfum í huga að þetta er tímabundið ástand. 

Gleðilega páska ,

Valdimar O Hermannsson