|
08:02 |
17. maí 2020 |
Mörg sveitarfélög illa stödd vegna hruns ferðaþjónustu
Byggðastofnun hefur gert samantekt á áhrifum niðursveiflu í ferðaþjónustu á atvinnuástand á landsbyggðinni en í henni er mikilvægi ferðaþjónustunnar greint eftir svæðum og sveitarfélögum. Niðurstöður leiða í ljós að mörg sveitarfélög verða fyrir miklum búsifjum vegna ástandsins en að mati Byggðastofnunar verða níu sveitarfélög fyrir þyngstu höggi; eitt á Norðurlandi eystra, fimm á Suðurlandi og þrjú á Suðurnesjum. |
|
07:55 |
16. maí 2020 |
Byrja að sekta fyrir nagladekk á fimmtudaginn
Lögreglan á Norðurlandi vestra mun byrja að sekta ökumenn fyrir notkun nagladekkja eftir 20. maí næstkomandi. Þegar vegir eru auðir slíta nagladekkin malbikið mun hraðar en önnur dekk og valda því mun meiri mengun. Lögreglan hvetur ökumenn til að skipta strax af nagladekkjum til að forða þeim frá háum sektum, sem geta numið allt að 80 þúsund krónum fyrir fólksbíl, eða 20 þúsund krónur á hvert nelgt dekk. |
|
14:55 |
15. maí 2020 |
Opnun sundlaugarinnar á Blönduósi seinkar vegna viðgerða
Tilkynning frá Íþróttamiðstöðinni á Blönduósi
Vegna flísaviðgerða á sundlaugarsvæðinu okkar þá opnum við ekki mánudaginn 18. maí eins til stóð. Stefnt er að opna í lok næstu viku. Flísaviðgerðir eru mun meiri en áætlað var og því seinkar verkinu því miður aðeins, eins hefur veðurfar sett strik í reikninginn. |
|
13:38 |
15. maí 2020 |
Vilja að sveitarfélög og ríkið komi saman að viðbyggingu við verknámshús FNV
Skólanefnd Fjölbrautaskóla Norðurlands vestra hefur sent Samtökum sveitarfélaga á Norðurlandi vestra erindi þar sem farið er yfir brýna þörf á viðbyggingu við verknámshús skólans. Þess er farið á leit að stjórn SSNV að hún beiti sér fyrir því að sveitarfélög á starfssvæðinu og ríkið komi saman að verkefninu svo hægt verið að hefja framkvæmdir hið fyrsta. |
|
13:22 |
15. maí 2020 |
Átaksverkefni á Norðurlandi vestra valin
Stjórn Samtaka sveitarfélaga á Norðurlandi vestra hefur ákveðið hvaða verkefni verða styrkt í tengslum við átaksverkefni í kjölfar kórónuveirufaraldursins. Alls bárust 90 hugmyndir með áætlaðan heildarkostnað á bilinu 250-300 milljónir króna. Til ráðstöfunar voru 50 milljónir, ásamt því sem farið var í endurskilgreiningu fyrri verkefna. |
|
11:08 |
15. maí 2020 |
Dýpkun Hvammstangahafnar nauðsynleg
Sveitarstjórn Húnaþings vestra telur afar mikilvægt að farið verði í dýpkunarframkvæmdir í Hvammstangahöfn á þessu ári þar sem ljóst þykir að sandur haldi áfram að safnast í höfnina og mögulega verði hún ófær næsta vor fyrir stærri skip. Sveitarstjórn ætlar að óska eftir því að Vegagerðin taki þátt í kostnaði við framkvæmdina vegna mikilvægi hafnarinnar fyrir flutninga inn á svæðið. |
|
10:51 |
15. maí 2020 |
Sumarátaksstörf fyrir námsmenn á Skagaströnd
Sveitarfélagið Skagaströnd auglýsir á heimasíðu sinni þrjú sumarstörf fyrir námsmenn 18 ára og eldri. Störfin eru hluti af atvinnuátaki sveitarfélagsins í samstarfi við Vinnumálastofnun til þess að fjölga tímabundið störfum fyrir námsmenn vegna kórónuveirufaraldursins. Störfin eru umhverfisstörf er varða fegrun umhverfis og bætta ásýnd sveitarfélagsins. Umsóknarfrestur til og með 24. maí næstkomandi. |
|
09:34 |
15. maí 2020 |
Dýralæknaþjónusta í dreifðum byggðum tryggð með samningum
Samningar hafa tekist við dýralækna í dreifðum byggðum landsins um að sinna nauðsynlegri dýralæknaþjónustu til næstu fimm ára. Samhliða voru gerðir verkkaupasamningar við dýralækna um að þeir sinni opinberum störfum fyrir Matvælastofnun og gerir það stofnuninni kleift að fækka héraðsdýralæknum og hagræða í rekstri. Þetta kemur fram í tilkynningu frá Matavælastofnun. |
|
14:05 |
14. maí 2020 |
Mótmæla lækkun fjárframlaga til viðhalds á varnargirðingum
Landbúnaðarráð Húnaþings vestra mótmælir því harðlega að fjárframlög til viðhalds á sauðfjarvarnargirðingum í sveitarfélaginu lækkuð í ár. Samkvæmt upplýsingum frá verktaka sem sér um viðhald varnargirðinganna hefur honum verið tilkynnt lækkun á fjárframlögum. Það þýðir að nauðsynlegt viðhald verður í lágmarki og varnir gegn smitsjúkdómum búfjár illviðráðanlegar. |
|
09:22 |
14. maí 2020 |
Telja að ferðaþjónustufyrirtækin sín komist í gegnum ástandið
Ferðaþjónustufyrirtæki á Norðurlandi telja að þau muni komast í gegnum það ástand sem Covid-19 veirufaraldurinn hefur skapað og ætla að vera með opið hjá sér í sumar. Þetta kemur fram í niðurstöðum könnunar sem Markaðsstofa Norðurlands gerði í byrjun maí. Meirihluti þeirra er að nýta úrræði ríkisstjórnarinnar, þar af eru flest þeirra að nýta hlutabótaleiðina, að því er segir í tilkynningu. |
|
09:02 |
14. maí 2020 |
Sóknaráætlanir fá 200 m.kr. viðbótarfjárveitingu
Sigurður Ingi Jóhannsson, samgöngu- og sveitarstjórnarráðherra, kynnti nýlega 200 milljóna króna viðbótarfjárveitingu í sóknaráætlanir landshluta en hún er liður í fjárfestingarátaki stjórnvaldi til að sporna gegn samdrætti í hagkerfinu í kjölfar heimsfaraldurs kórónuveiru og styðja við verkefni á landsbyggðinni. Norðurland vestra fær samtals 26 milljónir. |
|
12:00 |
13. maí 2020 |
Sigurður Líndal kveður Selasetrið
Sigurður Líndal Þórisson, sem gegnt hefur stöðu framkvæmdastjóra Selaseturs Íslands síðastliðin fjögur ár, hefur verið ráðinn verkefnastjóri Vestfjarðastofu á Hólmavík. Sigurður tekur við starfinu í byrjun júní og mun leiða verkefnið Brothættar byggðir í Strandabyggð auk þess að sinna öðrum verkefnum tengdum atvinnu- og byggðaþróun hjá Vestfjarðastofu. |
|
14:27 |
12. maí 2020 |
Ræsing Norðurlands vestra
Nýsköpunarmiðstöð Íslands, í samstarfi við Samtök sveitarfélaga á Norðurlandi vestra, leitar að góðum viðskiptahugmyndum sem auka flóru atvinnulífs í sveitarfélögunum. Þátttakendur fá leiðsögn og fræðslu um hugmyndavinnu, vöru- og þjónustuþróun, fjármögnun og áætlanagerð. Verkefnið verður unnið í júní og verða áætlanir rýndar í ágúst. |
|
09:57 |
12. maí 2020 |
Nýtt húsnæði BAH formlega afhent
Brunavarnir Austur-Húnvetninga eru fluttar í nýtt húsnæði að Efstubraut 2 á Blönduósi. Formleg afhending fór fram síðastliðinn föstudag og að því tilefni kom hluti slökkviliðsmanna saman og skoðaði húsnæðið. Í ljósi aðstæðna var ekki hægt að boða til viðburðar þannig að gestir gætu skoðað húsnæðið en það verður vonandi gert síðar. Í nýja húsnæðinu verður hægt að hafa allar bifreiðar og búnað liðsins undir sama þaki, auk þess sem hægt verður að útbúa ýmsa nauðsynlega aðstöðu. |
|
08:49 |
12. maí 2020 |
Hljómdiskur með lögum úr Hárinu
Leikflokkur Húnaþings vestra gaf nýverið út hljómdiskinn Hárið í Húnaþingi. Á disknum má heyra lög úr söngleiknum Hárinu en upptakan fór fram á sýningu leikflokksins í Þjóðleikhúsinu á síðasta ári. Hljóðblöndun önnuðust bræðurnir Gunnar Smári og Sigurvald Ívar Helgasynir. Gaman er að segja frá því að þó Hárið hafi verið gefið út í nokkur skipti þá hafa lögin aldrei verið eins mörg og á þessum diski. |
Til baka
Loka
Prenta
