|
22:12 |
13. sep. 2020 |
Sigruðu Stokkseyri og efstir í B riðli
Sameiginlegt lið Kormáks og Hvatar sigraði B riðil 4. deildar Íslandsmótsins í knattspyrnu karla en lokaumferðin var leikin í dag. Liðið á móti Stokkseyri á Blönduósvelli og endaði leikurinn 5-2. Hilmar Þór Kárason og Oliver James Kelaart Torres skoruðu tvö mörk hvor og Ingvi Rafn Ingvarsson eitt. Með sigrinum endaði liðið á toppi B riðils með 28 stig eða einu stigi meira en KFR. Bæði liðin fara í úrslitakeppni 4. deildar sem hefst laugardaginn 19. september. |
|
21:53 |
13. sep. 2020 |
Göngum í skólann - Fjölskylduganga
Tilkynning frá Blönduskóla
Þriðjudaginn 15. september verður boðið upp á fjölskyldugöngu klukkan 17:00 í tilefni af verkefninu Göngum í skólann. Lagt verður af stað frá Íþróttamiðstöðinni og genginn rúmlega 3 km hringur um Blönduós, farið verður í gegnum Fagrahvamm, Glaðheima og Hrútey því gæti þessi leið verið torfarin fyrir kerrur/vagna.
Hvetjum við fjölskyldur til að mæta með okkur í þessa göngu og eiga skemmtilega samverustund með öðrum fjölskyldum í leiðinni. |
|
15:39 |
13. sep. 2020 |
Nemendur settu niður 600 krókusa
Nemendur í Blönduskóla tóku þátt í skemmtilegu verkefni í síðustu viku er þeir settu niður 600 haustlauka sem kallast krókusar í kirkjuhólinn á Blönduósi. Björk Bjarnadóttir, umhverfisþjóðfræðingur og fyrrverandi nemandi við skólann, hafði yfirumsjón með verkefninu og nutu nemendur aðstoð hennar auk starfsfólks Blönduskóla og Snjólaugar hjá áhaldahúsi Blönduósbæjar. Sagt er frá þessu á vef Blönduskóla. |
|
15:11 |
11. sep. 2020 |
Áfram réttað í Húnavatnssýslum um helgina
Réttarstörf halda áfram í Húnavatnssýslum um helgina. Á morgun, laugardaginn 12. september, verður m.a. réttað í Fossárrétt, Kjalarlandsrétt og Stafnsrétt í Austur-Húnavatnssýslu og í Hamarsrétt og Þverárrétt í Vestur-Húnavatnssýslu. Landlæknir gaf nýverið út nýjar leiðbeiningar vegna gangna og rétta. Áður hafði verið miðað við tveggja metra nándarmörk og því gefin út tveggja kinda regla, en í kjölfar þess að tveggja metra reglan varð að eins metra reglu er nú í gildi einnar kindar regla. |
|
14:41 |
11. sep. 2020 |
Mikill verðmunur á matvöru á landsbyggðinni
Verðlagseftirlit ASÍ kannaði á þriðjudaginn matvöruverð í 15 minni matvöruverslunum á landsbyggðinni. Í ljós kom að í um helmingi tilfella var yfir 80% munur á hæsta og lægsta verði á þeim vörum sem verð var kannað á. Á 56 vörutegundum af þeim 103 sem kannaðar voru, var 60-140% munur á hæsta og lægsta verði og yfir 140% verðmunur á 12 vörutegundum. Mikill verðmunur var á hæsta og lægsta verði í öllum vöruflokkum. |
|
11:16 |
11. sep. 2020 |
Hugur í norðlenskri ferðaþjónustu
Meirihluti forsvarsmanna ferðaþjónustufyrirtækja á Norðurlandi eru telja að fyrirtæki þeirra muni komast í gegnum þá erfiðleika sem Covid-19 faraldurinn hefur orsakað. Þetta kemur fram í nýrri könnun sem Markaðsstofa Norðurlands stóð fyrir í ágúst.
Könnunin er svipuð þeirri sem var gerð á vormánuðum, en tilgangurinn var að sjá hvort eitthvað hefði breyst hjá fyrirtækjunum síðan þá. |
|
09:03 |
11. sep. 2020 |
Gul viðvörun vegna vatnsveðurs
Veðurstofa Íslands hefur gefið út gula veðurviðvörun fyrir daginn í dag og fram á laugardag á Ströndum og Norðurlandi vestra. Gert er ráð fyrir talsverðri eða mikilli rigningu á norðanverðum Ströndum. Búast má við auknu afrennsli og vatnavöxtum í ám og lækjum sem eykur hættu á flóðum og skriðuföllum og getur valdið tjóni og raskað samgöngum. Fólk er hvatt til að sýna aðgát. |
|
16:31 |
10. sep. 2020 |
100 laxa vika í Miðfjarðará
Alls hafa veiðst 1.507 laxar í Miðfjarðará sem af er sumri og gaf síðasta veiðivika 100 laxa en veitt er á átta stangir í ánni. Miðfjarðará er í þriðja sæti yfir aflahæstu ár landsins og er í fyrsta sæti þeirra vatnakerfa sem byggja veiði ekki alfarið á seiðasleppingum. Laxá á Ásum er komin í 647 laxa og gaf síðasta veiðivika 44 laxa, veitt er á fjórar stangir. Veiði í Blöndu var hætt þegar hún fór á yfirfall og stendur því í stað með 475 laxa. Víðidalsá er komin í 433 laxa með vikuveiði upp á 80 laxa. |
|
15:44 |
10. sep. 2020 |
Sæti í úrslitakeppninni tryggt
Sameiginlegt lið Kormáks og Hvatar er komið í úrslitakeppni 4. deildar í Íslandsmótinu í knattspyrnu karla. Það var staðfest í gærkvöldi þegar Skautafélag Reykjavíkur tapaði fyrir Álafossi. SR sem er í þriðja sæti B riðils getur þar með ekki náð Kormáki/Hvöt að stigum sem er í öðru sæti í riðlunum en tvö efstu liðin fara í úrslitakeppnina. KFR er í efsta sæti með 27 stig og hefur spilað alla sína leiki í riðlinum. Kormákur/Hvöt er í öðru sæti en getur með sigri á sunnudaginn komist á topp riðilsins. |
|
14:23 |
10. sep. 2020 |
Auglýsa lóðir án gatnagerðargjalda
Sveitarstjórn Skagastrandar ætlar að fella niður öll gatnagerðargjöld vegna bygginga á lóðum við götur í sveitarfélaginu sem eru nú þegar tilbúnar. Byggingalóðirnar verða auglýstar sérstaklega og þurfa umsóknir að berast fyrir áramót. Röð umsókna gildir varðandi afgreiðslu og úthlutun á einstaka lóðum.
Við úthlutun lóðanna gilda ákvæði um að byggingarframkvæmdir skuli vera hafnar innan árs frá úthlutun og að byggingar hafi hlotið fokheldisvottorð innan tveggja ára. |
|
14:07 |
10. sep. 2020 |
Áætlaðar skatttekjur lækkaðar um 60 milljónir
Á fundi byggðarráðs Húnaþings vestra á mánudaginn var lögð fram tillaga að viðauka við fjárhagsáætlun sveitarfélagsins fyrir árið 2020. Tillagan er fyrst og fremst tilkominn vegna áhrifa sem COVID-19 faraldurinn hefur á rekstur sveitarfélagsins, bæði til lækkunar tekna og aukis kostnaðar. Að auki hefur snjóþungur vetur orðið til þess að hækka þarf áætlun vegna snjómoksturs og hálkuvarna. Viðaukinn gerir ráð fyrir að skatttekjur sveitarfélagsins lækki um 60 milljónir á árinu. |
|
10:08 |
10. sep. 2020 |
Æfingar að hefjast hjá kirkjukór Blönduóskirkju
Tilkynning frá stjórn
Kirkjukór Blönduóskirkju hefur æfingar á nýju starfsári þann 16. september, en æfingar undir stjórn Eyþórs Franzsonar Wechner organista verða alla miðvikudaga í vetur klukkan 20-22.
Framundan er spennandi starfsár með margs konar samstarfi og uppákomum. Okkur vantar alltaf nýtt fólk í kórinn, þannig að endilega kíkið á okkur ef þið hafið áhuga á söng. |
|
09:27 |
10. sep. 2020 |
Meðaltals hækkun afurðaverðs til bænda 6,5%
Allar afurðastöðvar í sauðfjárrækt hafa nú birt gjaldskrár afurðaverðs til bænda. Hæst er verðið hjá Kaupfélagi Skagfirðinga og Kaupfélagi Vestur-Húnvetninga, 508 krónur á kíló og hækkar um 6% milli ára. SAH Afurðir á Blönduósi greiða 503 krónur á kílóið og nemur hækkun milli ára um 9%. Sláturfélagi Vopnfirðinga greiðir 507 krónur á kíló lambakjöts og nemur hækkunin milli ára 8,5%. |
|
20:36 |
09. sep. 2020 |
Íbúar á landsbyggðinni fá lægri flugfargjöld
Íbúar á landsbyggðinni með lögheimili fjarri höfuðborginni eiga frá og með deginum í dag kost á lægri flugfargjöldum til borgarinnar. Sigurður Ingi Jóhannsson, samgöngu- og sveitarstjórnarráðherra, kynnti þessa nýjung, sem ber heitið Loftbrú, á kynningarfundi í flugstöðinni á Egilsstöðum í dag. Loftbrú veitir afsláttarkjör til þeirra sem eiga lögheimili á landsbyggðinni fjarri höfuðborgarsvæðinu og á eyjum. Undir Loftbrú falla Vestfirðir, hluti af Norðurlandi vestra, Norðurland eystra, Austurland, Hornafjörður og Vestmannaeyjar. |
|
20:28 |
09. sep. 2020 |
Íslenskt - láttu það ganga
„Frá bakara til forritara. Frá forritara til hönnunar. Frá hönnun til bænda. Frá bónda til bakara. Frá þér til þín. Þannig gengur þetta - frá þér til þín í stöðugri hringrás.“ Þetta er á meðal þess sem atvinnuvega- og nýsköpunarráðuneytið ásamt Samtökum iðnaðarins, Samtökum atvinnulífsins, Samtökum verslunar og þjónustu, Samtökum ferðaþjónustunnar, Samtökum fyrirtækja í sjávarútvegi, Samtökum fjármálafyrirtækja, Samorku og Bændasamtökum Íslands, vilja minna landsmenn á í kynningarátakinu Íslenskt - láttu það ganga sem fór af stað í dag. |
Til baka
Loka
Prenta
