|
14:54 |
28. okt. 2020 |
Höldum hrekkjavöku einungis heima
Almannavarnadeild ríkislögreglustjóra vekur athygli á því að á laugardaginn er hrekkjavaka sem sífellt hefur notið meiri vinsælda hér á landi og víða hefur skapast sú hefð að börn gangi í hús með „grikk eða gott". Að teknu tilliti til þess að enn er í gildi neyðarstig almannavarna vegna COVID-19 hvetja almannavarnir foreldra og forráðamenn að halda upp á hrekkjavökuna með börnum sínum með öðru sniði í ár. Höldum hrekkjavöku einungis heima öryggisins vegna. |
|
14:04 |
28. okt. 2020 |
Tveir í einangrun - ellefu í sóttkví
Aðgerðastjórn almannavarna á Norðurlandi vestra hefur uppfært skráningu yfir þá sem eru í einangrun og sóttkví vegna kórónuveirufarsóttarinnar. Nú eru tveir í einangrun og ellefu í sóttkví samanber meðfylgjandi töflu. Aðgerðastjórnin minni á sóttvarnirnar. Við erum öll almannavarnir. |
|
11:45 |
28. okt. 2020 |
Lyfja endurskoðaði opnunartímann en TM lokar
Byggðarráð og sveitarstjórn Húnaþings vestra hafa mótmælt boðaðri skerðingu á þjónustu TM og Lyfju á Hvammstanga. Lyfja boðaði styttingu á opnunartíma og TM hefur ákveðið að loka útibú sínu. Lyfja hefur nú tekið til endurskoðunar opnunartíma sinn og verður útibúið opið frá klukkan 11-16. Byggðarráð fagnar ákvörðuninni og leggur áherslu á að góð dagleg þjónusta skipti íbúa Húnaþings vestra miklu máli. TM telur aftur á móti óumflýjanlegt að loka útibúinu. |
|
09:34 |
28. okt. 2020 |
Samstarfsnefnd um sameiningu fullskipuð
Sveitarstjórnir Húnavatnshrepps og Skagabyggðar hafa samþykkt tillögu sameiningarnefndar Austur-Húnavatnssýslu um að um að sveitarfélögin fjögur í sýslunni hefji formlegar sameiningarviðræður og skipi tvo fulltrúa hvert sveitarfélag og tvo til vara í samstarfsnefnd. Húnavatnshreppur hefur skipað Jón Gíslason og Ragnhildi Haraldsdóttur í samstarfsnefndina og Jóhönnu Magnúsdóttur og Þóru Margréti Lúthersdóttur til vara. Skagabyggð hefur skipað Karenu Steinsdóttur og Magnús Björnsson í samstarfsnefndina. |
|
09:23 |
28. okt. 2020 |
Tesla opnar ofurhleðslustöð í Staðarskála
Rafbílaframleiðandinn Tesla mun í komandi viku opna nýja ofurhleðslustöð fyrir viðskiptavini sína við Staðarskála í Hrútafirði, að því er fram kemur í Morgunblaðinu í dag. Afl hverrar hlöðu, sem eru átta talsins, er 250 kW en það er fimmfalt það sem fyrstu hraðhleðslustöðvarnar sem settar voru upp hér á landi gátu annað. Þá eru þessar hlöður tæplega 70% aflmeiri en aðrar hlöður sem önnur fyrirtæki eru að setja upp hér á landi með stuðningi Orkusjóðs. |
|
13:06 |
27. okt. 2020 |
Einn í einangrun - 12 í sóttkví
Samkvæmt tilkynningu frá aðgerðastjórn almannavarna á Norðurlandi vestra í dag er einn í einangrun í landshlutanum vegna kórónuveirusmits og 12 eru í sóttkví. Aðgerðastjórnin ítrekar mikilvægi þess að slaka hvergi á í persónubundnum sóttvörnum. „Vöndum okkur áfram, ferðumst ekki að óþörfu, munum fjarlægðarmörk, grímunotkun, handþvott og sprittnotkun,“ segir í tilkynningunni. |
|
12:04 |
27. okt. 2020 |
Gerum betur
Frá Stéttarfélaginu Samstöðu
Námskeið sem Gerum betur ehf., í samstarfi við starfsmenntasjóði Lands- Sveitar- Ríkis og Sjómennt munu bjóða félagsmönnum Stéttarfélagsins Samstöðu uppá rafræn námskeið tímabundið, þeim að kostnaðarlausu. Til að bóka sig á námskeiðin hafið þá samband við Gerum betur ehf. S: 8998264 eða í netfang gerumbetur@gerumbetur.is. |
|
16:46 |
26. okt. 2020 |
Nýjar reglur um ungmennaráð í Húnavatnshreppi
Sveitarstjórn Húnavatnshrepps hefur samþykkt nýjar reglur um ungmennaráð. Hlutverk þess er m.a. að efla tengsl ungmenna í sveitarfélaginu og auka tengsl þeirra við stjórnkerfi þess. Þá á ráðið að vera sveitarstjórn til ráðgjafar um málefni ungs fólks í Húnavatnshreppi og leggja fram tillögur um það hvernig æskilegt væri að haga starfsemi stofnana sveitarfélagsins. Sveitarstjóra hefur jafnframt verið falið að leita eftir tilnefningum í ungmennaráðið. |
|
16:32 |
26. okt. 2020 |
Árs- og haustþing SSNV haldið í fjarfundi
Samtök sveitarfélaga á Norðurlandi vestra héldu sitt 28. ársþing síðastliðinn föstudag og fór það fram í fjarfundi. Samhliða ársþinginu var 4. haustþing samtakanna haldið. Ársþingið átti að fara fram í apríl en var frestað og þegar líða tók á samkomutakmarkanir var ákveðið að halda árs- og haustþing samhliða. Þetta var í fyrsta sinn sem þing samtakanna er haldið í fjarfundi og tókst framkvæmdin vel, að því er segir á vef SSNV. Ný stjórn var kjörin á ársþinginu. |
|
10:07 |
26. okt. 2020 |
Okkur vantar garn dokkur eða hespur
Ágætu Húnvetningar.
Félagsstarfið að Þverbraut 1 leitar til ykkar um hvort þið eigið garn dokkur eða hespur sem má vinda upp. Garn dokkur eru undnar upp en við endur vindum þær mega líka vera hnyklar (ekki Lopi). Það er yndislega kona hún Herdís Ellertsdóttir sem styttir sér stundir við að vinda upp bæði heima og í starfinu hjá okkur. |
Til baka
Loka
Prenta
