13:49 |
08. maí 2024 |
Landsáætlun um útrýmingu á sauðfjárriðu
Bjarkey Olsen Gunnarsdóttir matvælaráðherra hefur lagt fram í samráðsgátt landsáætlun um um riðuveikilaust Ísland. Áætlunin er unnin af starfshópi sem var skipaður í janúar 2024 og gerir hún ráð fyrir umtalsverðri breytingu á nálgun við útrýmingu riðuveiki frá því sem verið hefur. Horft er frá því að reyna að útrýma riðusmitefninu sjálfu en megináhersla lögð á að útrýma veikinni með ræktun fjárstofns sem ber verndandi arfgerðir gegn smitefninu ásamt áframhaldandi aðgerðum til að hefta mögnun og dreifingu þess. |
09:14 |
08. maí 2024 |
45. árgangur Húna kominn út
Húni, ársrit Ungmennasambands Vestur-Húnvetninga, er kominn út og að þessu sinni 45. árgangur. Birtar eru fréttir síðasta árs úr öllum gömlu sveitarfélögunum sem mynda Húnaþing vestra og minnst þeirra sem létust á síðasta ári á svæðinu. Einnig eru í ritinu frásagnir, ljóð og annar fróðleikur úr héraði. |
16:06 |
07. maí 2024 |
Götur og gangstéttir sópaðar á Blönduósi
Húnabyggð ráðgerir að götur og gangstéttir verði sópaðar mánudag 13. maí næstkomandi. Biðlað er til íbúa að hreinsa bílastæði við hús sín og færa bíla og önnur farartæki af götum svo hægt sé að sópa allar götur og gangstéttir. |
10:39 |
07. maí 2024 |
Plokkdagur á Skagaströnd á uppstigningardag
Sveitarfélagið Skagaströnd hvetur til umhverfis- og plokkdags á Skagaströnd fimmtudaginn 9. maí. Fólk er hvatt til að plokka eða snyrta sitt nærumhverfi svo sem að sópa stéttir eða plön. Gámar verða sunna við Oddagötu 12 og á stígnum meðan við Bankastræti. Pylsur verða grillaðar við Bjarmanes klukkan 13 og eru allir velkomnir. |
06:23 |
07. maí 2024 |
Hópslysaæfing á laugardaginn
Haldin verður hópslysaæfing í umdæmi lögreglustjórans á Norðurlandi vestra á laugardaginn. Æfingin fer fram ofan við Blönduós, á gatnamótum Ennisbrautar og Neðribyggðarvegar. Ennisbraut verður því lokuð við Mýrarbraut og Þverárfjallsveg frá klukkan 11 og fram eftir degi. Reikna má með að bifreiðum sem ætlaðar eru til neyðaraksturs verði ekið með forgangsmerkjum á þessum tíma um Ennisbraut og Húnabraut að fjöldahjálparstöð og söfnunarsvæði slasaðra sem verður í Íþróttamiðstöðinni á Blönduósi. |
15:10 |
06. maí 2024 |
Tilboða óskað í leigu á veiðirétti í Blöndu og Svartá
Laxveiðiárnar Blanda og Svartá hafa verið auglýstar til leigu frá og með sumrinu 2025. Einkahlutafélagið Starir er með vatnasvæðið á leigu í dag en núgildandi leigusamningur rennur út í haust. Veiðifélag Blöndu og Svartár óskar eftir tilboðum í leigu eða umboðssölu á öllum veiðirétti félagsins í laxveiðiánum frá og með sumrinu 2025 og til og með sumrinu 2029 með almennu útboði. |
14:55 |
06. maí 2024 |
Nýr einstaklingsbúningsklefi í Íþróttamiðstöðinni Hvammstanga
Tekinn hefur verið í notkun einstaklingsbúningsklefi í Íþróttamiðstöðinni Hvammstanga og er hann staðsettur við hlið gufuklefans. Aðstaðan hentar þeim fjölbreytta hópi sem vill og þarf að hafa fataskipti í einrúmi, að því er segir á vef Húnaþings vestra. Þar kemur fram að uppsetning búningsaðstöðunnar sé í samræmi við jafnréttisáætlun sveitarfélagsins en þar kemur fram að aðstaða í skólum og íþróttamiðstöð skuli henta þörfum ólíkra hópa. |
14:48 |
06. maí 2024 |
Vonbrigði með úthlutun úr Framkvæmdasjóði ferðamannastaða
Sveitarstjórn Skagabyggðar varð fyrir miklum vonbrigðum með nýlega úthlutun styrkja úr Framkvæmdasjóði ferðamannastaða. Sveitarfélagið sendi inn tvær umsóknir, annars vegnar vegna hönnunar á Kálfshamarsvíkursvæðinu og hins vegar vegna verndun Kálfshamarsvíkur. Aðeins var úthlutað til hluta þess síðar nefnda og nam hún 3,6 milljónum en sótt var um rúmar 6,7 milljónir. |
14:30 |
06. maí 2024 |
Rjúpum fjölgar við Blönduós
Höskuldur Birkir Erlingsson hefur frá árinu 2002 haldið utan um rjúpnatalningu við Blönduós. Ávallt hefur verið talið um mánaðamótin apríl/maí og karrar eingöngu taldir. Samkvæmt nýjustu talningu er rjúpum að fjölga en 91 rjúpa var talin að þessu sinni og er það 25% fjölgun frá fyrra ári. Frá árinu 2021 er fjölgunin 168%. Svæðið sem talið var á afmarkast af Svínvetningabraut og niður með Laxá á Ásum, að þjóðvegi 1 og svo niður að Blönduósi. |
11:54 |
06. maí 2024 |
Gullborgar Húnabyggð 70 ára og eldri og makar
Frá Birni Þór og Söndru
Fimmtudaginn 9. maí milli klukkan 18:00 og 20:00 langar okkur á B&S Restaurant að bjóða ykkur upp á fiski hlaðborð og meðlæti (frítt en frjálsframlög eru þegin og renna þau til Blönduóskirkju vegna viðhalds og uppsetningu á salernum fyrir fatlaða).
Ef þið hafið EKKI áhuga að þiggja þetta boð okkar vinsamlegast hafið samband í síma 898 4685 og afpantið. |
17:25 |
04. maí 2024 |
Tap í fyrsta leik í 2. deild
Kormákur Hvöt hóf leik í 2. deild Íslandsmótsins í knattspyrnu karla í dag. Mótherjinn var Selfoss og fór leikurinn fram á Jáverk-vellinum á Selfossi. Jafnræði var með liðunum í fyrri hálfleik og lítið um færi. Staðan í hálfleik 0-0. Selfoss náði að skora eina mark leiksins í seinni hálfleik og var það eiginlega gegn gangi leiksins. Kormákur Hvöt fékk nokkur góð færi og eitt dauðafæri en inn vildi boltinn ekki. Lokatölur 1-0 fyrir Selfoss. |
17:22 |
04. maí 2024 |
Framkvæmdir hafnar við Flúðabakka
Framkvæmdir eru hafnar við byggingu 6 íbúða raðhúss við Flúðabakka á Blönduósi. Stefnt er að því að íbúðirnar verði tilbúnar í haust. Um er að ræða fyrri áfanga að þessu verkefni en síðar er stefnt að því að byggja þriggja íbúða raðhús á sama reitnum. |
17:05 |
04. maí 2024 |
Aðalfundur Krabbameinsfélags Austur-Húnavatnssýslu
Frá stjórn
Aðalfundur félagsins verður haldinn mánudaginn 13. maí klukkan 18:00 á Apotekarastofunni Blönduósi. Venjuleg aðalfundarstörf og önnur mál. Félagsmenn eru hvattir til að mæta og nýir félagar velkomnir. Við minnum á minningarkort Krabbameinsfélags A.-Hún. sem fást í Lyfju Blönduósi, Lyfju Skagaströnd og á síðu félagsins á www.krabb.is. |
11:10 |
04. maí 2024 |
Opinn fundur um Prjónagleðina
Opinn fundur um Prjónagleðina, sem fram fer helgina 7.-9. júní í sumar, verður haldinn í Ỏsbæ mánudaginn 6. maí klukkan 17. Í auglýsingu um fundinn segir að Húnabyggð taki að þessu sinni beinan þátt í skipulagningu hátíðarinnar og leggi metnað sinn í að viðburðurinn verði líflegur og áhugaverður fyrir gesti og heimafólk. |
10:58 |
04. maí 2024 |
Kjósa á um sameiningu Húnabyggðar og Skagabyggðar í júní
Samstarfsnefnd um sameiningu Húnabyggðar og Skagabyggðar hefur skilað áliti sínu til sveitarstjórna sveitarfélaganna. Nefndin kom saman á þremur bókuðum fundum, en nefndarmenn höfðu áður skipað verkefnahóp sem falið var að skoða möguleika á sameiningu sveitarfélaganna. Það er álit nefndarinnar að fram skuli fara atkvæðagreiðsla meðal íbúa um sameininguna. Jafnframt leggur nefndin til að henni verði falið að undirbúa atkvæðagreiðslu og kynna tillöguna og helstu forsendur fyrir íbúum. |