15:24 |
22. feb. 2023 |
Áfangastaðurinn Norðurland vestra 2030
Opinn fundur í Miðgarði
Áfangastaðurinn Norðurland vestra 2030 er heiti á opnum fundi sem haldinn verður í Miðgarði miðvikudaginn 2. mars næstkomandi klukkan 16-18. Á fundinum mun Hjörtur Smárason hjá Saltworks kynna niðurstöður verkefnis, sem hann hefur unnið fyrir Samtök sveitarfélaga á Norðurlandi vestra undanfarna sex mánuði. |
11:23 |
22. feb. 2023 |
Ragnheiður Jóna nýr sveitarstjóri Þingeyjarsveitar
Sveitarstjórn Þingeyjarsveitar hefur samið við Ragnheiði Jónu Ingimarsdóttur um að taka að sér starf sveitarstjóra Þingeyjarsveitar út kjörtímabilið. Ragnheiður Jóna starfaði sem sveitarstjóri Húnaþings vestra 2019-2022. Áður starfaði hún sem framkvæmdastjóri afmælisnefndar aldarafmælis sjálfstæðis og fullveldis Íslands. |
16:35 |
21. feb. 2023 |
Um áhrif vatnsflóða og klakastíflna
Á vef Náttúrustofu Norðurlands vestra er fjallað um áhrif vatnsflóða, sambærilegra þeirra og áttu sér stað nýverið í Svartá og Blöndu, á lífríki ánna og umhverfi þeirra. Þar segir að í desember og janúar hafi allar ár á Norðurlandi vestra verið ísilagðar eftir langverandi frost og ísinn víða um 60-80 sentímetra þykkur, og sumstaðar jafnvel allt að 120 sentímetra þykkur. Í hlýindum brotnar ísinn upp og ryðst fram með vatnsflóðum og þá geti miklar klakastíflur myndast og vatn borist upp á tún og árbakka. |
11:34 |
21. feb. 2023 |
Auglýst eftir umsjónaraðila með framkvæmd 17. júní hátíðarhalda á Hvammstanga
Húnaþing vestra auglýsir eftir aðila, félagasamtökum eða einstaklingum sem eru reiðubúnir að taka að sér umsjón, undirbúning og framkvæmd hátíðarhalda á Hvammstanga, þjóðhátíðardaginn 17. júní 2023. Áhugasamir geta skilað inn umsókn til Tönju Ennigarð íþrótta- og tómstundafulltrúa tanja@hunathing.is eða á skrifstofu Húnaþings vestra fyrir 20. mars næstkomandi. |
20:17 |
20. feb. 2023 |
Tólf kærðir á hálftíma fyrir hraðakstur
Á miðvikudaginn í síðustu viku var lögreglan við hraðamælingar í grennd við Húnaskóla á Blönduósi. Á um 30 mínútna tímabili voru tólf hraðakstursbrot kærð. Sá sem hraðast ók var á 55 kílómetra hraða á klukkustund á vegkafla þar sem leyfilegur hámarkshraði er 30 kílómetrar á klukkustund. Í tveimur tilvikum notuðu ökumenn ekki öryggisbelti og voru þau ætluðu brot einnig kærð. Þetta kemur fram í facebookfærslu Lögreglunnar á Norðurlandi vestra. |
17:50 |
20. feb. 2023 |
Úttekt á brunavörnum í Skagabyggð
Slökkvilið Skagabyggðar áætlar að hefja úttekt á brunavörnum í sveitarfélaginu á miðvikudaginn og stefnir að því að heimsækja öll lögbýli á næstu tveimur vikum. Vatnsöflun í tengslum við slökkvistörf verður sérstaklega skoðuð og brunavarnir í stærri húsum yfirfarnar. Í leiðinni verður boðið upp á að yfirfara slökkvitæki og þá verður hægt að kaupa eða panta ný slökkvitæki hjá slökkviliðinu. |
17:40 |
20. feb. 2023 |
Ekki þarf að sjóða vatn á Hvammstanga
Niðurstöður rannsókna á neysluvatni á Hvammstanga hafa leitt í ljós að ekki er lengur um of hátt gerlainnihald að ræða og því er ekki lengur þörf á að sjóða neysluvatn. Íbúar á Hvammstanga hafa undanfarna rúma viku orðið að sjóða allt neysluvatn vegna mengunar sem greindist í annarri af vatnslindum bæjarins. Jarðvegsgerlar fundust í vatninu, sem eru ekki skaðlegir fólki nema í miklu magni. |
09:40 |
19. feb. 2023 |
Nýtt íslenskt frumkvöðlafyrirtæki að hefja starfsemi á Blönduósi
Í helgarblaði Morgunblaðsins er fjallað um Foodsmart Nordic, nýtt íslenskt frumkvöðlafyrirtæki í fæðubótarefnum sem hyggst hefja starfsemi á Blönduósi með vorinu. Rætt er við Katrínu Amni Friðriksdóttur stjórnarformann og Viðar Þorkelsson, framkvæmdastjóra fyrirtækisins. Katrín segir að framleiðslutæki fyrirtækisins hafi komið til landsins í síðustu viku og séu á leiðinni norður og framkvæmdir við 500 fermetra framleiðsluhús séu á lokastigi, þannig að starfsemi ætti að geta hafist á öðrum ársfjórðungi. |
07:08 |
19. feb. 2023 |
Opnað fyrir framtalsskil einstaklinga 1. mars
Opnað verður fyrir framtalsskil einstaklinga 2023, vegna ársins 2022, miðvikudaginn 1. mars næstkomandi. Framtalið verður aðgengilegt á þjónustuvef Skattsins, www.skattur.is, og ber öllum sem náð hafa 16 ára aldri í lok árs 2022 að skila skattframtali og telja fram. Lokaskiladagur er 14. mars. |
15:09 |
18. feb. 2023 |
Brúin yfir Svartá opnuð eftir viðgerðir
Brúavinnuflokkur Vegagerðarinnar vann að viðgerðum á brúnni yfir Svartá þessa vikuna en hún skemmdist þegar Svartá ruddi sig að kvöldi mánudagsins 13. febrúar síðastliðinn. Á vef Vegagerðarinnar kemur fram að skemmdir voru mun minni en í fyrstu var talið en viðgerðum lauk í gær. Fyrstu fréttir hermdu að brúin væri ónýt og ekkert annað að gera en rífa hana. |
15:04 |
18. feb. 2023 |
Konudagstónleikar Sóldísa í Miðgarði
Á morgun heldur kvennakórinn Sóldísir sína árlegu konudagstónleika og að þessu sinni bera þeir yfirskriftina Eitt lag enn. Á fjölbreyttri efnisskrá tónleikanna verða Eurovision lög. Þrjár Blönduóskonur syngja með kórnum, Þórhalla Guðbjartsdóttir, Lilja Árnadóttir og Hanna Jörgensen. Tónleikarnir eru haldnir í Menningarhúsinu Miðgarði og hefjast klukkan 15. |
14:56 |
18. feb. 2023 |
Söfnun á rúlluplasti í Húnabyggð
Frá Húnabyggð
Bændur sem óska eftir því að nýta sér þessa þjónustu eru vinsamlegast beðnir um að senda beiðni á netfangið: ahaldahus@hunabyggd.is fyrir klukkan 16:00 þriðjudaginn 21. febrúar næstkomandi. Plasti verður safnað dagana 22.-24. febrúar. Plastið þarf að vera komið út úr húsi og vel aðgengilegt fyrir menn að ná plastinu úr körum eða öðru sem plastið er geymt í. Einnig þarf aðkeyrsla fyrir ruslabílinn að vera góð. |
14:51 |
18. feb. 2023 |
Mengunarsýnin týndust
Sýni sem voru tekin til að kanna hvort enn væri mengun í neysluvatni á Hvammstanga týndust í flutningum. Á vef Húnaþings vestra kemur fram að þetta verði til þess að niðurstöður seinki fram á mánudag en ný sýni voru tekin í gær. Þangað til niðurstaða liggur fyrir eru íbúar beðnir að halda áfram að sjóða vatn fyrir neyslu. |