13:19 |
14. jún. 2020 |
Reiðnámskeið fyrir börn (10-15 ára)
Frá Ásdísi og Marie
Boðið verður upp á reiðnámskeið dagana 26.-28. júní í Reiðhöllinni á Blönduósi fyrir krakka á aldrinum 10-15 ára. Á námskeiðinu verða reiðtíma, leikir og verkefni tengd gangtegundum og reiðmennsku, kökuveisla og fleira skemmtilegt. Kennarar verða Ásdís Brynja Jónsdóttir og Marie Holzemer. Þær hafa báðar lokið fyrsta árinu á Hólum. |
12:38 |
14. jún. 2020 |
Laxveiðin að komast á fullt skrið
Í vikunni opna helstu laxveiðiár Húnavatnssýslna hver af annarri. Miðfjarðará opnar á morgun mánudag og Laxá á Ásum opnar á þriðjudag. Víðidalsá og Vatnadalsá opna laugardaginn 20. júní. Hrútafjarðará opnar 1. júlí og eins og fram hefur komið í fréttum opnaði Blanda 5. júní síðastliðinn. Laxveiðin í fyrra var sú sjöunda minnsta sem skráð hefur verið frá árinu 1974 og sú minnsta frá árinu 2000. Laxveiðimenn eru bjartsýnir með að meira veiðist í sumar. |
09:47 |
13. jún. 2020 |
Auglýst eftir tilboðum í sandblástur og málun gömlu Blöndubrúarinnar
Blönduósbær auglýsir nú eftir tilboðum í verkið: Göngubrú í Hrútey, sandblástur og málun 2020. Í verkinu felst sandblástur og málun á stálvirki gömlu Blöndubrúarinnar sem upphaflega var byggð árið 1897. Brúin er í geymslu í malarnámu á Blönduósi og er aðgengi að henni því gott. Hún er um 37,5 metra löng, 4 metra breið og 4,5 metra há, gerð úr stálprófílum og bitum sem hnoðaðir eru saman. |
09:16 |
13. jún. 2020 |
Hátíðarhöld með breyttu sniði
Hátíðarhöld í Blönduósbæ í tilefni þjóðhátíðardagsins 17. júní verða með breyttu sniði í ár vegna aðstæðna sem allir ættu að þekkja. Bæjarbúar eru hvattir til að halda upp á daginn með vinum og fjölskyldu, halda sína eigin þjóðhátíð, grilla, syngja og dansa. Þá verður hægt að skella sér í sund þar sem sundlaugin verður opin frá klukkan átta að morgni og til níu um kvöldið. Frítt verður í sund í tilefni dagsins og þess að sundlaugin á tíu ára afmæli 16. júní. |
09:05 |
13. jún. 2020 |
Bát hvolfdi á Langavatni á Skaga
Björgunarsveitir á Norðurlandi voru kallaðar út um klukkan 15:30 í gær eftir að skemmtibát með þrjá innanborðs hvolfdi á Langavatni á Skaga. Í tilkynningu frá Slysavarnafélaginu Landsbjörg segir að um klukkan fjögur hafi sjúkraflutningamenn og björgunarsveitamenn verið komnir að vatninu og búnir að finna fólkið sem sat ofan á bátnum. |
19:37 |
12. jún. 2020 |
Héraðsfundur Húnavatns- og Skagafjarðarprófastsdæmis
Héraðsfundur Húnavatns- og Skagafjarðarprófastsdæmis 2020 verður haldinn sunnudaginn 14. júní. Fundurinn hefst með messu í Hólaneskirkju á Skagaströnd klukkan 11:00. Sr. Bryndís Valbjarnardóttir þjónar fyrir altari, sr. Dalla Þórðardóttir prédikar, organisti er Eyþór Wechner Franzson. Fundarstörf fara fram í félagsheimilinu Fellsborg klukkan 13:00. Sofía Krantz fjallar um veiru og vetur á léttum nótum. Fundurinn er opinn öllu þjóðkirkjufólki. |
15:56 |
12. jún. 2020 |
Karlareiðin verður þriðjudaginn 16. júní
Ákveðið er að árleg karlareið fari fram þriðjudaginn 16. júní næstkomandi. Safnast verður saman við Sauðanes og riðið sem leið liggur niður að Köldukinn og síðan þar sem leið liggur í reiðhöllina. Þar verður grillað að venju og gleðin heldur áfram. |
15:30 |
12. jún. 2020 |
Bændafundir SAH Afurða ehf.
Tilkynning frá SAH Afurðum ehf.
Bændafundir SAH Afurða ehf. til að ræða komandi sláturtíð næsta haust verða haldnir á þremur stöðum á næstunni. |
12:43 |
12. jún. 2020 |
Leikjanámskeið á Blönduósi
Nú verður endalaus gleði og gaman hjá okkur í sumar. Við erum búin að setja upp skemmtilega 6 vikna dagskrá, endalaus ævintýri og gaman. Jón Karl Einarsson ætlar að leiða börnin um í þessum ævintýrum í sumar. Kíkið endilega á dagskrána. |
12:34 |
12. jún. 2020 |
Fjöldamörk á samkomum breytast eftir helgi
Á mánudaginn tekur gildi auglýsing heilbrigðisráðherra um frekari tilslökun á samkomubanni vegna COVID-19. Meginbreytingin felst í því að fjöldamörk á samkomum hækka úr 200 í 500. Núgildandi takmarkanir á gestafjölda sundlauga og líkamsræktarstöðva við 75% af leyfilegum hámarksfjölda falla jafnframt niður á mánudaginn 15. júní. Aðrar breytingar verða ekki. |
12:27 |
12. jún. 2020 |
Samráð um endurskoðun byggðaáætlunar hafið
Undirbúningur að endurskoðun byggðaáætlunar hófst formlega í gær á samráðsfundi sem samgöngu- og sveitarstjórnarráðuneytið hélt með byggðamálaráði, landshlutasamtökum sveitarfélaga, stýrihópi stjórnarráðsins um byggðamál og Byggðastofnun. Við þetta tækifæri opnaði Sigurður Ingi Jóhannsson, samgöngu- og sveitarstjórnarráðherra, samráðsvettvang á vef Byggðastofnunar þar sem allir geta lagt fram hugleiðingar og hugmyndir um mótun, form, inntak og framkvæmd byggðaáætlunar. |
08:10 |
12. jún. 2020 |
Ekkert þjóðhátíðarkaffi í Skagabúð
Ekkert verður af árvissu þjóðhátíðarkaffihlaðborði í Skagabúð þetta árið. Það hefur verið árviss viðburður hjá kvenfélagskonum í Heklu í Skagabyggð að bjóða upp á sitt sívinsæla og margrómaða kaffihlaðborð á þjóðhátíðardaginn en vegna aðstæðna í þjóðfélaginu verður það ekki gert núna. Í tilkynningu segjast þær vonast til að sjá alla í þjóðhátíðarstuði að ári. |
14:22 |
11. jún. 2020 |
Jákvæð rekstrarniðurstaða hjá Blönduósbæ
Ársreikningur Blönduósbæjar vegna ársins 2019 var samþykktur á sveitarstjórnarfundi á þriðjudaginn og var sveitarfélagið rekið með 23 milljón króna hagnaði. Rekstrartekjur námu 1.233 milljónum króna og hækkuðu um 15% milli ára. Rekstrargjöld námu 1.104 milljónum og hækkuðu um 14% milli ára. Rekstrarniðurstaða ársins fyrir afskriftir, fjármunatekjur og fjármagnsgjöld nam 129 milljónum. Eigið fé í árslok 2019 nam 836 milljónum og eiginfjárhlutfallið 37%. |
14:06 |
11. jún. 2020 |
Breytingar í byggðaráði og nýr forseti sveitarstjórnar Blönduósbæjar
Á fundi sveitarstjórnar Blönduósbæjar á þriðjudaginn voru kosningar samkvæmt samþykktum og urðu breytingar á skipan byggðaráðs. Guðmundur Haukur Jakobsson verður áfram formaður og Sigurgeir Þór Jónasson kemur inn sem aðalmaður fyrir Hjálmar Björn Guðmundsson af L -lista. Gunnar Tryggvi Halldórsson og Birna Ágústsdóttir skipta um sæti og verður Gunnar Tryggvi nú aðalmaður en Birna varamaður fyrir Ó-lista. Varamenn í byggðaráði fyrir L-lista eru Hjálmar Björn og Arnrún Bára Finnsdóttir. |
12:16 |
11. jún. 2020 |
Sýrlendingarnir komnir með íslensk ökuréttindi
Sýrlenska flóttafólkið sem kom til Blönduóss og Hvammstanga á síðasta ári hefur verið í bóklegu og verklegu ökunámi í vetur hjá ökukennaranum Selmu Svavarsdóttur. Af 18 fullorðnum höfðu 16 áhuga á að öðlast íslensk ökuréttindi en níu voru fyrir með sýrlensk ökuskírteini. Eftir námið í vetur eru þau nú öll komin með íslensk ökuskírteini. Í vikunni luku síðustu fimm konurnar í hópnum verklegu prófi. Selma hefur verið ökukennari í 20 ár og hefur hún kennt á bíl í Húnavatnssýslunum báðum og víðar um land. |